Hidrogeno berde merkea lortzeko partzuergo berria

H2Basque partzuergoa sortu da, hidrogeno berdea kostu txikian sortzeko teknologiak garatzeko. Tecnalia buru dutela, elkarlana abiatu dute Tubacex Innovacionek, Cidetecek, CIC Energigunek, EHUk, Teknikerrek, Petronor Innovacionek eta Energiaren Klusterrak. Besteak beste, hidrogenoa sortzeko hiru prototipo dituzte esku artean: hidrogenoa anioi truke bidez sortuko duten mintz elektrolizagailuak, protoi truke bidezko mintz elektrolizagailuak eta ziklo termokimikoak. Tecnaliak azaldu duenez, proiektuak «hidrogeno berdea sortzeko teknologiak prozesu industrialetan nola integratu ere ikertuko du», baita teknologia ezartzeko erabilera industrialik egokienak ere.