IDEKO-IK4, MENDE LAURDEN BERRITZEN

Ikerketaren eta berrikuntzaren garrantziaz inor gutxi jabetzen zen 1986. urtean, Ideko-IK4 zentro teknologikoa sortu zutenean. Elgoibarko Arriaga industrialdeko eraikin zahar batean hasi ziren lanean, bigarren eskuko ordenagailu batekin. 25 urte beranduago, oso bestelako itxura dute kooperatibaren azpiegiturek, bidean izandako lorpenengatik, neurri handi batean. Makina-erremintako enpresak puntako teknologiaz hornitzea izan da zentro teknologikoaren egiteko nagusia. Eta horretan dirau, nahiz eta azken urteetan bere negozioa dibertsifikatzera jo duen. Zentroak 25 urte bete dituela ospatzeko ekitaldietan dira egunotan. Zorionak.