Eustatek gorantz berrikusi ditu uztailaren amaieran egoera ekonomikoari buruz emandako datuak. Orduan esan zuen Arabako, Bizkaiko eta Gipuzkoako barne produktu gordina %0,8 hazi zela urteko bigarren hiruhilekoan aurrekoarekin alderatuta. Gaur, berriz, %1eko hazkundearen berri eman du. Urte arteko hazkunde tasa, berriz, hamarren bat igo du, %2,6tik %2,7ra.
Hazkundearen erritmoa bizkortu egin da aurtengo lehen hiruhilekoarekin alderatuz gero, orduan %0,6 hazi baitzen hiruhilearteko tasan, eta %2,2 urte artekoan.
Bizkortze horretan zerikusi handia izan du industriaren bilakaera onak. Eustaten arabera, -%0,3 uzkurtu zen urteko lehen hiruhilekoan, baina %3 handitu da bigarrenean. Arrazoietako bat izan daiteke Petronor berriro martxan dabilela, urte hasierako geldialdiaren ondoren. Baina hobekuntzak industria osoari dagokio: manufaktura-industria %1,3 hazi zen urteko lehen hiruhilekoan eta %1,8 bigarrengoan.
Horrenbestez, industriaren urte arteko hazkunde tasa zerbitzuek dutenarekin parekatu da berriro ere: %3,1. Zerbitzuen artean, bilakaera onena merkataritza, ostalaritza eta garraioak izan dute, %3,3koa alegia. Edonola ere, azken hiruhilekoan hazkundea pixka bat moteldu da, eta %0,8 hazi da (lau hamarren gutxiago).
Merkataritzaren eta ostalaritzaren hazkundeak kontsumo pribatuaren igoera erakusten du. Eskariaren aldetik neurtuta, etxeguneen kontsumoa ere handitzen ari dela dio Eustatek. Horrela, %1,7 handitu da aurreko hiruhilekoarekin alderatuz gero, eta konpentsatu du erakunde publikoen gastua %3,9 jaitsi izana.
Kontsumo horrek enpresak inbertsioak egitera animatu ditu. Kapital eraketa gordina %1,8 handitu da iaztik, eta horren barruan bereziki ekipo ondasunetan egiten den inbetrsioa (%5,9). Hau da, industria bere ekoizpena handitzeko edo hobetzeko makina berrietan inbertitzen ari dela.
