Krisiaren intentsitatea jaisten ari dela erakusten duen beste datu bat kaleratu du Espainiako estatistika institutuak. Haren arabera, jaisteari utzi dio industriaren produkzioak, eta goranzko bidean jarri da aspaldiko partez. Edonola ere, irailean EAEn izandako hazkundea (%5,2) eta Nafarroakoa (%1,6) ez dira nahikoak azken urteko tasa negatiboak iraultzeko: azken urtean %3,5 txikitu da industriaren produkzioa Araba, Bizkai eta Gipuzkoan, eta %3, berriz, Nafarroan.
INEren datuak ez datoz bat Eustatek atzo emandakoekin. Horiek zioten, egutegiaren efektua zuzendu ondoren, EAEko industria ekoizpenaren indizea %1,8 jaitsi dela iazko irailetik aurtengora. Hori bai, uzkurtzearen erritmoa berriro jaitsi da, %3,9tik %3,6ra.
