Gipuzkoako Aldundia ez dago ados Gorenaren erabakiarekin, eta Espainiako Auzitegi Konstituzionalera jotzea aztertzen ari da. Aitortzen dute Diputazioan ez dela erraza izango horrek helegitea onartzea, baina zer aukera dagoen aztertzen ari dira. Larraitz Ugarte bozeramaileak esan du "albiste oso txarra" dela gipuzkoarrentzat.
Auzia 2006koa da. Kutxak Repsolen akzioen harira 94,7 milioi euro bereganatu zituen 1997tik 2004ra, eta sozietate zergan 27,2 ordaindu behar izan zizkion Gipuzkoako Ogasunari. Horrekin ados ez, ordea, eta auzibidera jo zuen, soilik 4,2 ordaindu behar zituelakoan. Argudiatu zuen akzio horiek ez zituela zuzenean kudeatzen, zeharka baizik, Repinves sozietatearen bitartez.
EAEko Justizia Auzitegi Nagusiak arrazoia eman zion Ogasunari, baina Gorenaren erabakiak likidazioa baliogabetu du eta ondorioz, 21,5 milioi itzuli beharko dizkio Aldundiak Kutxabanki, eta horiei dagozkien interesak. Guztira 30 milioi euro inguru dira.
Victor Bravok bere gain hartu zituen ikuskaritzak
Ugartek, ordea, zehaztu du Gorenaren epaia ez dela auziaren muinera sartu. Azaldu du Justizia Auzitegi Nagusiak ebatzi zuela iruzur fiskala egon zela "Kutxak Gipuzkoari gutxiago ordain ziezaion". 2001. urtean Gipuzkoako Ogasunak egin zuten ikuskaritzan, ordea, ez zuen detektatu. Ondorioz, Aldundiaren bozeramaileak nabarmendu du Gorenak ebatzi duena dela 2006an bigarren aldiz ikuskatu eta antzemateak ez duela balio, eta horren ondorioz itzuli beharko duela dirua.
Ugartek jakinarazi du, gainera, lehen ikuskaritza egin zenean Victor Bravo zela Ogasun zuzendari, eta horrek ikuskaritzak egiteko ardura bere gain hartu zuela langileen funtzioak aldatuz.
