Bankuen sektorean ere «inguru makroekonomikoan aldeko baldintzak nabari dira», Kutxabanken esanetan. Horien eskutik, BBK, Kutxa eta Vital Kutxaren bankuak 254,2 milioi euro irabazi ditu urteko lehen bederatzi hilabeteetan, iaz epe horretan baino %10,1 gehiago. Euriborra oraindik balio negatiboetan izan arren, bankuak lortu du horiei etekina ateratzea: 416,3 milioi euroko irabazia utzi diote interesek (+%0,1) eta 290,5 milioikoa komisioek (+%3,5). Mailegu ustelei edo zalantzazkoei aurre egiteko baztertutako dirua, berriz, gutxitu egin du: 145,8 milioi izan dira, %62,2 gutxiago.
Datu ekonomiko horien eskutik, hipoteka mailegu berrien kontratazioan errekorra lortu du Kutxabankek: 14.500etik gora eman ditu urtarriletik irailera arte, iaz baino %21,6 gehiago. Horren eskutik, %37,7ko merkatu kuota du Araban, Bizkaian eta Gipuzkoan. Kreditu pertsonaletan ere krisi aurreko maila gainditu du: 358 milioi eman ditu aurten.
Taldearen berankortasuna ere behera doa: aurten 0,48 puntu jaitsi dira zalantzazko maileguak, eta talde osoaren %4,41 dira.
Kapital aldetik osasuntsu dago Kutxabank: %16tik gorakoa du CET1 kalitate goreneko kapital ratioa, eta horri esker espero du erraz gaindituko duela Europako Banku Zentralak aurki plazaratuko duen estres azterketa.
