Langabezia sarian gertatzen den iruzurrari buruzko zenbaki borobil zein tranpatia eman du Soraya Saenz de Santamaria Espainiako Gobernuko lehendakariordeak. Haren arabera, 520.000 iruzurgile atzeman dituzte azken urte eta erdian, eta horri esker 3.000 milioi berreskuratu dituzte. Hau da, sari hori jasotzen duen bost lagunetik bati kendu diotela saria (2,9 milioi jasotzaile zeuden abuztuan). Enplegu Ministerioaren datu ofizialek, baina, datu horiek gezurtatu egiten dituzte. Haien arabera, aurtengo lehen erdian 60.004 laguneri kendu zaie saria, «ez zeudelako lan egiteko prest, edo ez zituztelako hura jasotzeko edo mantentzeko baldintzak betetzen». Haien artean sei milara ez dira iristen benetako iruzurra egin zutenak, hau da, aldi berean lan egin eta saria jasotzen zutenak —9.452 izan ziren 2012. urte osoan—.
Iazko lehen erdian 52.269 laguneri kendu zietenez saria, 520.000 iruzurgileren ezinezko kopurura iristeko aldi baterako saria galdu dutenak batu ditu Saenz de Santamariak. Horrela, aurtengo lehen sei hilabeteetan 123.000 lagunek galdu dute prestazioren bat agiri guztiak ez emateagatik, hitzordu batera huts egiteagatik edo berritzea ahaztutzeagatik. Ministerioak ez du hori iruzurtzat jotzen.
