Urtero lez, Europako Batasuneko arrantza ministroek abenduko Kontseiluan negoziatuko eta finkatuko dituzte Ipar Itsasoari eta Atlantikoari dagozkien hurrengo urterako arrantza kuotak eta baita Batasuneko herrialdeen artean banatu ere. Hain zuzen, negoziazio horietarako oinarri izango diren datuak gaur aurkeztu ditu Europako Batzordeak. Txosten zientifikoak oinarri hartuta, arrantza eremu bakoitzean espezie bakoitzetik gehienez harrapatu daitezkeen tona kopuruak proposatu ditu.
Euskal arrantzaleentzako ez da albiste oso txukunik iritsi Bruselatik. Batzordeak legatzaren kuotak murriztu nahi ditu eta ez gutxi. Ipar stockean —Sole Handian eta Bizkaiko Golkoan— legatzaren arrantza %19 apaltzea nahi du Bruselak; eta hego stockean, berriz, —Kantauri itsasoan eta Portugalgo uretan— are handiago litzateke murrizketa, %30ekoa. Legatza diru iturri garrantzitsua izaten da euskal arrantza flotarentzat.
Zapo gutxiago arrantzatzea ere proposatu du Europako Batzordeak. Ipar stockerako baimendutako kopurua %12 apalduko litzateke euskal ontzientzat. Bizkaiko Golkoan murrizketa txikiagoa litzateke, %2koa.
Oilarra da, Bruselaren ustetan, gehiago babestu behar den beste espezieetako bat, ipar stockean behintzat. Bizkaiko Golkoan eta Irlandako uretan %10ean apaldu nahi ditu harrapaketak eta %17ko murrizketa ikusten du Eskoziako uretarako. Aldiz, hegoaldeko uretan, oilar gehiago arrantzatzeko aukera ikusten du, Bizkaiko Golkorako eta Portugalgo kostarako kuota %20 handitzea proposatu baitu.
Antxoaren kuotei buruzko proposamenik ez du oraindik egin Bruselak, ez behintzat, Bizkaiko Golkoari eta Kantauri itsasoari dagokionean. Portugalgo eta Cadizko uretan %43ko murrizketa nahi du.
Txitxarroaren harrapaketetan, kuotak igotzeko aukera ikusten du Bruselak zenbait eremutan, hala nola, Sole Handian, Bizkaiko Golkoan eta Kantauri itsasoan; horietan Harrapaketan %21 handitzea proposatu du.
