Alternatiba enpresaren itxiera zela ikusita, CELeko langileen batzarrak Lucarten proposamena onartu zuen astearte arratsean. Baina enpresa batzordearen oniritzia behar zen —ELAk gehiengoa du—, eta ez da gaur arratsaldera arte iritsi. Azken saio bat egin zuen kaleratzeak gutxitzeko eta kalte-ordainak handitzeko, eta bi xedeak lortu zituela aldarrikatu du.
Horrenbestez, 59 langilek erretiro aurreratua hartuko dute, eta 21 kalera joango dira, horietatik lau beren borondatearen aurka. Kaleratzea onartu dutenak lan poltsa batean sartuko dira, eta haiei deituko diete enpresak norbait kontratatu behar badu.
Paper enpresa konkurtsoan sartu zenean, 222 langile zituen, eta lau lantegi: bi Artziniegan (Araba), eta bana Bizkaiko Enkarterriko bi herritan, Zallan eta Gueñesen.
Lanean geratzen diren langileek soldata txikiagoak jasoko dituzte. Soldatak batez beste %20 jaitsiko dira: gutxienez %8 txikituko diete (80 langileri), eta gehienez %50 (zuzendari batek).
Lucarten alde egin zuten erakundeek, sektoreko enpresa delako, eta eskaintza «serioa» egin zuelako. 6,3 milioi pagatuko ditu CELen truke, eta agindu du hurrengo bost urteotan hogei milioi inbertituko dituela.
