Espainiako Lan Ministerioak gaur eman ditu ezagutzera langabeziaren martxoko datuak, eta Hego Euskal Herrian 5.534 langabe gehiago erregistratu zirela jakinarazi du. Araban, Bizkaian eta Gipuzkoan langabeziak gora egin du; Nafarroan, aldiz, behera egin du otsaileko datuekin alderatuta: 561 langabe gutxiago zeuden izena emanda, horietatik 452 zerbitzuetan.
Iazko martxoko datuen aldean, ordea, Hego Euskal Herriko lurralde guztietan egin du gora. Iaz baino 15.000 langabe gehiago daude: guztira, 196.856. Nafarroan bezala, beste lurraldeetan zerbitzuek baldintzatu dituzte datuak. Izan ere, Bizkaian 1.502 langabe gehiago daude sektore horretan, Araban 882 gehiago eta Gipuzkoan 872 gehiago.
Araban, Bizkaian eta Gipuzkoan izan den gorakadak zerikusia du aurreko astean INEMen zerrendetan atzeman zuten akatsarekin. Langairen eta INEMen zerrendak bateratzean, ohartu ziren hiru lurralde horietan INEMen zerrendan ez zeudela erregistratuta Langain izena emandako 7.500 langabe.
Datuak
Araba. Martxo bukaeran, 24.894 langabe: otsailetik +2.647 (+%11,9), iazko otsailetik +4.450 (%21,77).
Bizkaia. Martxo bukaeran, 83.498 langabe: otsailetik +2.195 (+%2,7), iazko otsailetik +7.496 (+%9.86).
Gipuzkoa. Martxo bukaeran, 43.159 langabe: otsailetik +1.253 (+%2,99), iazko otsailetik +1.480 (+%3,55).
Nafarroa. Martxo bukaeran, 45.305 langabe: otsailetik -561 (-%1,22), iazko otsailetik +1.552 (+%3,55).
Hego Euskal Herria. Martxo bukaeran, 196.856 langabe: otsailetik +5.534, iazko otsailetik +14.978.
