Julien Charles Pirinio Atlantikoetako prefetak jakinarazi du Mauleko hiltegia kategoriaz apaltzeko prozedura gibelatuko duela, plantan ezarriko den gobernantza berriari «aukera guziak emateko». Izan ere, hiltegia kategoriaz apaltzeko mehatxua egin zuten prefeturaren zerbitzuek iragan astean. Zehazki, DDPP Herritarren Babesteko Departamenduko Zuzendaritzak hiltegiaren kategoria fiskala apaldu nahi zuen, higiene eta segurtasun arau batzuk errespetatzen ez zituelakoan. Laborariek eta hiltegiko Administrazio Kontseiluak, ordea, DDPPko agentearen jokamoldeak salatu zituzten, eta, beraz, Administrazio Kontseiluko kideek dimisioa eman zuten, argudiatuta hiltegiek arau «zorrotzegiak» bete behar dituztela. Bada, gobernantza berriaren zain, prefetak bertan behera utzi du kategoria apaltzeko prozedura, behin-behinean.
Laborariek protesta egin zuten atzo Mauleko hiltegiaren egoera salatzeko, eta kategoriaz apaltzeko duen arriskua gaitzesteko. Hiltegian, Euskal Hirigune Elkargoaren egoitzan, suprefeturan, eta Angeluko hiltegi industrialean ekintzak egin zituzten, tokiko hiltegiak «arriskuan» direla salatzeko. Jean Rene Etxegarai elkargoko lehendakariarekin bildu zen hiltegiko erabiltzaileen delegazio bat, eta hark hitzeman zien arazoaren alde guziak biltzeko bilera bat egiteko prest zegoela, aterabideak atzemate aldera. Laborariek erran zuten Etxegaraik «entzun» zituela, baina erran ziela ez zela «estatua baino fiteago joaten ahal». Prefetak erran du ados dagoela bilera bat egiteko.
Nolanahi ere, prefetak orain iragarri duen neurriak ez du finkatzen hiltegiaren geroa. Ondoko asteetan, elkargoak eta prefeturak aztertu beharra dute gobernantza berria nola plantan ezarri. Laborarien eskaera da herriarteko sindikatu bat bezala egituratzea egitura, Zuberoako herri guzietako hautetsiek gobernantzan parte har dezaten. Orain arte, sei hautetsi ziren Administrazio Kontseiluan. Etxegaraik atzo erran zuenez, «aukera guziak mahai gainean» daude.
