Istiluak izan dira berriro ere Jaka Horien manifestazioan. Protesta Eliseoaren aurrean amaitzea zuten helburu, baina Frantziako Poliziak bidea moztu die, eta negar gasa eta ur kanoiak erabilita sakabanatu ditu manifestariak. Agintariek Parisko hainbat metro geltoki ere itxi dituzte.
Barne Ministerioaren datuen arabera, 8.000 lagun inguru batu dira Parisen erregaien prezioen igoera salatzeko. Ordea, herrialde osoan deitu dute protestara. Hainbat tokitan errepideak moztu dituzte.
Emanuel Macron presidentearen gobernuak eskuin muturrari egotzi dio istiluen erantzukizuna, eta salatu du haien jarraitzaileak "sartu" dituztela manifestarien artean "giroa gaiztotzeko asmoz". Christophe Castaner Barne ministroak sare sozialetan gogorarazi du Marine Le Pen eskuin muturreko buruzagiak eskatu ziela Jaka Horiei Eliseoraino joateko.
Frantziako Estatu osoan ari dira protestan hainbat herritar, jaka horiak jantzita, erregaiaren prezioaren igoera dela eta. Euskal Herrian ere izan dira mobilizazioak. Mobilizazioak azaroaren 17an hasi zituzten estatu osoan. Joan den larunbatean, esaterako, 287.000 pertsona bildu ziren protestetan.
Datorren urtarriletik aurrera gasolinaren prezioak 2,9 zentimo egingo du gora, eta dieselarenak, berriz, 6,5 zentimo.
