Salbamendu plana onartu ezean AEBak "atzeraldi luze eta mingarrian" sartuko direla ohartarazi du Bushek

AEBetako buruzagi nagusiak kezkatuta daude krisi ekonomikoarekin, eta, gainera, kezka hori herritarrei helarazi nahi diete. George Bush presidenteak telebista bidez zabaldutako hitzaldia egin zuen atzo iluntzean (bart goizaldea Euskal Herrian), eta bere gobernuak ekonomia, eta, batik bat, finantza merkatua berbideratzeko proposatutako plana babesteko eskatu zien estatubatuarrei. Milaka milioi dolarren gastua izango duen egitasmo hori aurrera atera ezean AEBak "atzeraldi luze eta mingarrian" sartuko direla ohartarazi zuen.

"Normaletik kanpoko egoerek normaletik kanpoko ekintzak behar dituzte", agertu du, bestelako egoera batean Gobernuak finantza merkatuan esku hartzea ez lukeela inola ere baimenduko onartuz. "Finantza krisi larrian gaude, eta Gobernua neurri sendoekin ari da erantzuten". Guztira, 700.000 milioi dolar hondatutako finantza aktiboak salbatzeko erabiltzea proposatzen du Gobernuak.

Gainera, krisiari nola aurre egin eta zein neurri abian jarri aztertzeko Etxe Zurian egingo den bilerara gonbidatu ditu John McCain presidentetzarako hautagai errepublikanoa eta Barack Obama demokraten hautagaia. Biek onartu dute gonbidapena.

Gainera, hautagai biek ohar bateratua plazaratu dute egoera ekonomikoaren larritasunaz ohartaraziz eta neurri bateratuen beharra nabarmenduz. Gainera, McCainek kanpaina bertan behera uztea erabaki du indarrak "krisiaren konponbidean" jartzeko. Neurri zehatzak erabaki bitartean utzi du bertan behera, eta gauza bera egiteko eskatu du Obamari. Besteak beste, ostiralean bi hautagaien artean egitekoa den lehen eztabaida dago jokoan. Oraingoz, ez du ematen Obamak proposamena onartuko duenik.