Alabaina, Irlandako krisiak eta ondorengo erreskateak Euroguneko hainbat herrialderen zor publikoaren gaineko tentsioak berpiztu ostean, EBZk herrialde horietako tituluak erosteko borondate irmoa adieraztea espero zen. Kasu horretan, baina, ez zituen merkatuak erabat asebete, zuhurtzia handiz mintzatu baitzen Trichet: «Bonoak erosteko programak bere horretan jarraitzen du», besterik ez zuen esan.
Argi utzi zuen programa horrek ez duela zerikusirik Estatu Batuetako Erreserba Federalak eta Japoniako Bankuak euren herrialdeetako bonoak masiboki erosteko neurriarekin. «Ez da quantitative easing, guk berehala likidezia erretiratu egiten baitugu». Kazetariek bonoak erostearen inguruko galdera gehiago egin arren, Trichetek saihestu egin zuen uneoro auzi hori.
Tentsioa EBZren barnean
Zuhurtzia horrek arrazoi zehatz bati erantzuten dio. Maiatzaren 10az geroztik, zor publikoaren krisia euroguneko beste herrialdetara kutsatzeko arriskua ikusita, Espainiako, Greziako, Irlandako eta Portugalgo bonoak erosteari ekin zion, eta, orotara, 66.600 milioi euro inbertitu ditu ordutik hona. Alabaina, azken asteetan erosketa horien erritmoa nabarmen moteldu da, besteak beste neurri horrek EBZko gobernu kontseilu barruan ezadostasunak eragin dituelako.
Alemaniako Bundesbankeko agintariak publikoki bonoen erosketaren kontra azaldu dira argi eta garbi. Operazio horrekEBZren independentzia kolokan jar dezakeela uste du Bundesbankek, zor merkatuetan arazoak dituzten herrialde horietako gobernuen salbatzaile gisa ikusia izan daitekeelako EBZ. Era berean, luzera begira inflazioa sustatuko ote duten beldur da Alemaniako banku zentrala. Axel Weber Bundesbankeko presidentea kritiketan harago joan da, eta publikoki ohartarazi du bonoen erosketa bertan behera geratu beharko litzatekeela «egonkortasun arriskua» eragiten duelako.
Betidanik erabakiak aho batez hartu izan ditu EBZk, eta neurri oro ahots bakarrarekin defenditu izan ditu. Horregatik, Weberren eta Tricheten arteko ezadostasunek kalte egin diote nabarmen EBZren irudi publikoari berari, baita konfiantza pitzatu ere. Horregatik, Tricheten atzoko zuhurtziak ezadostasunak saihestu eta EBZren irudia hobetzeko nahiari erantzuten dio. Weberrek jarrera bera hartu zuen atzo, eta Trichetek emandako azalpenei ez ziela ezer gehiago erantsiko aipatu zien kazetariei kontseilu ostean.
Esanak esan, ezkutuan Europako Banku Zentrala Portugalgo eta Irlandako bonoak erosten jarraitzen dutela aipatu zioten merkatuetako iturriek Bloomberg agentziari. Gauzak horrela, azken asteetan zorraren finantzazioa gehien garestitu zaien herrialdeek arnas apur bat hartu zuten atzo: Portugalgo hamar urteko bonoen finantzazio kostua %0,5 jaitsi zen %6,13raino; Irlandaren tituluak %0,37 jaitsi ziren %8,76raino. Espainiaren kasuan, aste hasieran bonoak %5,6ra heldu ostean, atzo %5,07ra egin zuten behera.
Espainiaren zor jaulkipena
Bonoen finantzazio kostua merkatzeaz gain, bono horien gaineko arrisku sariak ere behera egin zuen EBZren gobernu kontseiluaz geroztik. Espainiaren kasuan, %3,09 merkatu da saria, eta, Portugalen kasuan, %4,06.
Espainiako Gobernuak gainera, atzo, azterketa garrantzitsu bat gainditu behar izan zuen zor merkatuetan, hiru urteko bonoak jaulki behar izan zituelako: 2.468 milioi euro jaulki zituen, guztira, batez beste %3,717ko interes tasean eta hasieran ezarritako gehienezko kopurutik gertu. Azken asteetan Espainiako zor tituluek jasan duten garestitzearen seinale, duela bi hilabete hiru urterako bono bidez 3.217 milioi euro finantzatu zituen batez beste%2,527ko prezioan.
Horregatik, atzo zor tituluen kostuak behera egin arren, gorabehera gehien jasan duten herrialdeek ezin dute lasaitu. Atzo bertan, Elena Salgado Espainiako Ekonomia ministroak Financial Times egunkariari emandako elkarrizketan, lasaitasun mezua igorri nahi izan zien inbertitzaileei: hartutako aurrezte neurrien ondorioz, hurrengo urtean Espainiak aurten baino 15.000 milioi euro gutxiago jaulkiko dituela merkatuetan jakinarazi zuen. Orotara, 30.000 milioi euro jaulkitzea espero da.
Hain justu, atzoko prentsaurrekoan, Tricheti Espainiako Gobernuak asteon hartutako neurrien inguruan galdetu zioten. Tricheten arabera, Zapateroren exekutiboak «erabateko sinesgarritasuna» lortzera bideratu behar du eginahal guztia. Sinesgarritasuna irabazte aldera, hartutako konpromisoak erabat bete behar dituela gaineratu zuen. Hala ere, eginahal hori euroguneko herrialde guztiek egin behar dutela azpimarratu zuen, eta ez soilik arazotan direnek. Diru politikaz gain, politika ekonomiko bateratu bateranzko urratsak egin behar direla iritzi dio: «EDBko [Europako Diru Batasuneko] E hori sendotu beharra dugu».
Merkatuetan zor tituluen aurka apustu egiten duten inbertitzaileei ere zuzendu zitzaien Trichet, eta ohartarazi zien hobe dutela eurogunea ez gutxiestea, egoera onbideratzeko buru-belarri tematuta daudelako hala EBZ nola gobernuak.
