Arabako Vidrala enpresa zabalkunde aro batean sartu da, emaitza ekonomiko apartek bultzatua. Beirazko produktuak ekoizten ditu, eta Portugalgo Santos Barosa bereganatzeko erabakia hartu du, pisu handia duen operazio bat, diru kopuruari erreparatuz gero. Vidralak 250 milioi euroko inbertsioa egingo du Santa Barosa erosteko. Erosketa horrekin, bete-betean sartuko da Portugalgo lehian, beiraren sektorean.
Bi enpresen arteko bat egiteak onurak ekarriko dituela esan du Vidralaren zuzendaritzak: "Bezeroentzat da ona, bai eta langileentzat eta akziodunentzat ere". Santos Barosak 400.000 tona beira ekoizten du urtero, eta 2017an 130 eta 135 milioi euroren arteko salmentak egitea espero du.
Vidralak, berriz, 45,16 milioi euroren mozkinak lortu ditu 2017ko lehen seihilekoan, aurreko urtean baino %33,5 gehiago. Arabako enpresak inoizko emaitzarik onenekin itxi dezake urtea.
