HIZTEGIA

A B C D E F G H I J K L M N O P Q R S T U V W X Y Z
 

Kaaba. Mekako meskita nagusiaren erdian dagoen eraikina, kubo formakoa.

 

kabaret (cabaret*).

 

kabia* e. habia.

 

kabildo. Kanaria uharteetako bakoitza gobernatzen duen erakundea. Kanaria Handiko Kabildoa.

 

kabinete. Gobernua, ministro taldea.

 

kadete. Kiroletako kategoria. Gainerakoak ikusteko, jo 'kiroletako kategoriak' sarrerara.

 

kadukatu 1* e. (epea) amaitu, (epea) bete, iraungi... Kadukatu baino lehen jango ditugu jogurtak*[e.] Epea bukatu baino lehen jango ditugu jogurtak.

 

kadukatu 2* e. zaharkitu, amaitu, -enak egin... Jarrera horiek kadukatuta daude*[e.] Jarrera horiek zaharkituta daude.

 

kafe. Kafea eta beste edari batzuk ematen dituen etxea ere bada.

 

kafkar (kafkiano*, kafkiar*).

 

kafkiano* e. kafkar.

 

kainoi* e. kanoi.

 

kaiola eramangarri (transportin*).

 

kaisar (kaiser*). Alemaniako enperadorea.

 

kakotx* e. koma. Euskaltzaindiaren Hiztegiak jasoa du 'kakotx', baina BERRIAk nahiago du forma bakarra erabili beti, eta 'koma' aukeratu du.

 

Kalagorria* e. Calahorra. Errioxako herria.

 

kalamu. Marihuana.

 

kalaxnikov (kalashnikov*). Sobietarrek sorturiko fusil mota.

 

kalbinismo, kalbinista.

 

Kalbino, Joan (Calvin*, Calvino*).

 

kaldereroak, -ak.

 

kalderete. Haragi eltzekaria. Kalderete lehiaketa izanen da bihar Barañainen.

 

kale. Oro har mintzatzeko, singularra erabili ohi da; herri edo hiri jakin batez aritzeko, berriz, plurala. Kaleetara atera nahi dute protesta*[e.] Kalera atera nahi dute protesta. // Kaleetan gustura ibiltzen da*[e.] Kalean gustura ibiltzen da. // Milaka lagunek protesta egin dute Iruñeko kaleetan.

 

kale itsu (cul-de-sac*). Irteerarik gabeko kalea.

 

Kalera Kalera (Kalera, Kalera*, Kalera-Kalera*). Hala salatu du Kalera Kalerak*[e.] Hala salatu du Kalera Kalera-k.

 

Kaleratzeak Stop (Stop Kaleratzeak*).

 

kalez jantzi* e. kaleko jantzi, zibil jantzi. Kalez jantzitako polizia bat*[e.] Kaleko jantzitako polizia bat. Zibil jantzitako polizia bat.

 

kalifa herri (kalifato*). Kalifa batek agintzen duen herria.

 

kalifaldi (kalifato*). Kalifa baten agintaldia.

 

kalifatza (kalifato*). Kalifa baten kargua.

 

kalifikatu. Batzuetan, aski da 'izendatu'. Baso eta nekazaritza lur gisa kalifikatu dituzte*[e.] Baso eta nekazaritza lur izendatu dituzte.

 

kalte kolateral* e. zehar kalte. Eufemismoa da, eta gehienetan 'biktima zibil' ordezkatzen du. Inoren esanetan bakarrik erabiltzen da BERRIAn 'zehar kalte'.

 

kalte pertsonalak izan* e. zauritu, hil... Zikloiak desmasiak egin ditu, baina ez du kalte pertsonal larririk utzi *[e.] Zikloiak desmasiak egin ditu, baina inor ez da larri zauritu.

 

kalte-ordain (indemnizazio*). Damu-domaia.

 

kaltean, kaltetan.

 

kaltebera, kalteberatasun. Kalteren bat jasateko arrisku handia duena; haren egoera. Gerratik ihesi doazen emakumeak eta beste talde kaltebera batzuk.

 

kaltetu 1. Kontuz aditz laguntzailearekin: 'nor' sailekoa behar du izan. Uholdeen ondorioz, guztiz kaltetu da autoa.

 

kaltetu 2* e. kalte egin, hondatu. Kontuz aditz laguntzailearekin: 'nor-nork' sailekoa behar izanez gero, 'kalte egin' erabili behar da. Uholdeek zenbait auto kaltetu dituzte*[e.] Uholdeek zenbait auto hondatu dituzte.

 

kamara* e. kamera.

 

kamera, kamerari (kamara*, cameraman*). Argazki kamera.

 

kamerino* e. jantzigela.

 

kamerlengo (kamarlengo*).

 

kamikaze. Gerrako pilotu suizida.

 

kamila* e. eskuohe.

 

kamiseta. Elastikoa, tixerta. Dena dela, kiroletakoak izendatzeko 'elastiko' erabiltzen da gehienbat.

 

kamuflaje (kamuflaia*).

 

kana-erdiko (kanaerdiko*).

 

kanal 1. Ubidea.

 

kanal 2. Itsasartea. Mantxako kanala, Panamako kanala, Suezko kanala.

 

kanal 3. Irrati edo telebista katea.

 

Kanalape; Kanala, -a. Ibarrangeluko hondartza.

 

kanbio 1* e. diru xehe, atzerako. Diru xeherik ez dudanez, billetearekin ordaindu beharko dut. Ordaindu diot, baina atzerakoa ez dit eman oraindik.

 

kanbio 2* e. truke.

 

Kandinski, Wassili (Kandinsky*).

 

kaneloiak (cannelloni*).

 

kanguru. Australiako ugaztuna. Ez erabili 'umezain' adierazteko.

 

kanoi, kanoikatu, kanoikada (kainoi*).

 

kanpainako ospitale* e. behin-behineko ospitale.

 

kanpainaurre (aurrekanpaina*).

 

kanpaldi, kanpaleku, kanpamentu, kanpatu (akanpada*, kanpamendu*, akanpatu*).

 

kanpaleku, kanpamentu (kanpamendu*). Beheko kanpalekua, kanpaleku nagusia.

 

kanpatu. Nonbait kanpalekua edo kanpadenda jarri. Aditz laguntzailea 'nor' sailekoa da. Hementxe kanpatu zuten*[e.] Hementxe kanpatu ziren.

 

kanpin. Euskaltzaindiaren Hiztegian 'kanpin' eta 'camping' ageri dira. BERRIAk 'kanpin' erabiliko du.

 

kanpus* e. campus.

 

kantata.

 

Kantauri itsasoa. h. Bizkaiko golkoa, Bizkaiko itsasoa.

 

kantautore. Norberak eginiko kantak abesten dituen kantaria.

 

kantiano (kantiar, kantar*). Kant filosofoari dagokiona.

 

kantoi. Izkina, ertza. Ez erabili 'kantonamendu' adierazteko. Ipar Euskal Herriko kantoiak*[e.] Ipar Euskal Herriko kantonamenduak. // Suitzako kantoietan*[e.] Suitzako kantonamenduetan.

 

kantonal* e. kantonamendu. Kantonaletako bozak*[e.] Kantonamenduetako bozak. Kantonamendu bozak.

 

kantzelatu* e. atzeratu, bertan behera utzi... Alitaliaren greba dela eta, 364 hegaldi kantzelatu dituzte*[e.] Alitaliaren greba dela eta, 364 hegaldi bertan behera utzi dituzte.

 

kantzilari* e. kantziler.

 

kantziler, kantzilerorde (kantzilari*, kantzilariorde*).

 

kapable. h. gai, gauza.

 

kapaz. h. gai, gauza.

 

kapazitismo, kapazitista. Desgaitasunen bat dutenen kontrako aurrejuzguak eta bereizkeriazko jokabidea; hala jokatzen duena.

 

Kapitolioa, -a. Ameriketako Estatu Batuetako Senatuaren eta Ordezkarien Ganberaren egoitza. Washingtonen dago.

 

kaputxadun (enkaputxatu*).

 

kar-kar-(kar). Barrearen onomatopeia.

 

Karabakh Garaia, -a. 'Nagorno-Karabakh' ere deitzen zaio, baina BERRIAn 'Karabakh Garaia' idatziko da, bi izen erabiltzea nahasgarri izan ez dadin.

 

karabela portuges. Marmoken itxura duen hidrozooa, oso ziztada mingarrikoa.

 

karaktere (karakter*). Tipografian erabiltzen da. Bi mila karaktereko testua behar dugu.

 

karaoke.

 

karate, karateka.

 

karbono-14 proba. Bizidunetan pilaturiko karbono-14 isotopoa neurtuz haiek noiz hil ziren zehazteko proba.

 

kardinal protodiakono. Aita santu hautatu berriaren izena jakinarazten duen kardinala.

 

kardinal, kardinalgo (kardinale*).

 

kardinalen kolegio.

 

kardiopulmonar* e. bihotz-biriketako.

 

kardulatzaren hamabostekoa, -a. Eskoziako errugbi selekzioa.

 

kargagailu (kargadore*). Bateria kargatzeko gailua.

 

kargaleku (elektrolinera*). Lurralde guztian elektrolinerak ezarri eta auto elektrikoaren erabilera bultzatu nahi dute*[e.] Lurralde guzian kargalekuak ezarri eta auto elektrikoaren erabilpena bultzatu nahi dute.

 

kargatu 1. Zamatu.

 

kargatu 2* e. oldartu. Israelgo Poliziak gogor kargatu zuen manifestari palestinarren kontra*[e.] Israelgo Polizia gogor oldartu zitzaien manifestari palestinarrei.

 

kargudun. Kargu jakin bat duena. Adiera honetan, ez erabili 'kargu'. Bertan ziren alkatea eta herriko gainerako karguak*[e.] Bertan ziren alkatea eta herriko gainerako kargudunak.

 

kargugabetu. h. kargua kendu, kargutik kendu.

 

Karibe. Artikulurik gabe deklinatzen da. Karibean izan gara*[e.] Kariben izan gara.

 

karibetar (karibear*).

 

kariño, kariñoso.

 

karka* e. antigoaleko, antzinako. Hi bai karka!*[e.] Hi bai antigoalekoa! Hi bai antzinakoa!.

 

Karlomagno (Carlomagno*, Charlemagne*).

 

karnet* e. nortasun agiri, gidabaimen, txartel.

 

Karonte. h. Karon.

 

karota* e. azenario.

 

Karraspio. Mendexako hondartza.

 

karrera 1. h. lasterketa.

 

karrera 2. h. ikasketak.

 

karretila* e. eskorga.

 

karril* e. lerro, bide. Hiru karrileko errepidea egitea erabaki dute*[e.] Hiru lerroko / bideko errepidea egitea erabaki dute.

 

kart, karting.

 

karta 1. Karta jokoetan, nahiago dut pokerra.

 

karta 2* e. gutun, eskutitz.

 

karta 3* e. mapa.

 

karta berde 1* e. txartel berde. Nazioarteko auto asegurua.

 

karta berde 2* e. -n bizitzeko baimena.

 

karta jokoetako sailak. Urrea, ezpata, kopa, bastoia; pika, bihotza, hirusta, diamantea. Bateko urrea, txanka ezpata, txota ezpata, zaldun urrea, errege bastoia.

 

Kartago (Cartago*, Carthage*).

 

kartel 1. Afixa.

 

kartel 2. Sektore bereko enpresen elkartea, lehia murrizteko sortua.

 

kartel 3. Droga edo arma trafikatzaileen taldea.

 

karteldegi* e. zinema aretoak, ikuskizunak... Karteldegian zer dagoen kontuan hartuta, hobe etxean geratzea*[e.] Zinema aretoetan zer dagoen kontuan hartuta, hobe etxean geratzea.

 

kartesianismo, kartesiar.

 

kartier* e. auzo, auzune.

 

kartilla (kartila*).

 

kartzelatu (kartzelaratu*).

 

kasa. Nire kasa*, hire kasa*, gure kasa*, zure kasa*, zuen kasa*[e.] Neure kasa, heure kasa, bere kasa, geure kasa, zeure kasa, zeuen kasa, beren kasa.

 

kasazio auzitegiak. Kasazio errekurtsoa erabakitzeko auzitegiak.

 

kasba (qasbah*). Afrikako iparraldeko zenbait hiritako parte zaharra.

 

kasete.

 

kaskamotz, skin, skinhead.

 

kaskezur (kaskahezur*).

 

kaskilo* e. bala zorro.

 

kasko urdin. NBEren agindupeko soldaduak.

 

Kasparov, Garri (Gari*, Garry*).

 

kastak. Asia hegoaldeko kastak: brahmanak (brahimins); gerlariak (kshatriya); merkatari, nekazari eta abeltzainak (vaishiya); eskulangileak (shudra); ukiezinak edo pariak (dalit).

 

kasu 1. Gehiegi erabiltzen da. Bera Berako jokalariek ez dakite zer egin horrelako kasuetan*[e.] Bera Berako jokalariek ez dakite zer egin horrelakoetan. // Kasurik onenean ere, dirua galduko dute*[e.] Onenean ere, dirua galduko dute. // Osakidetzan atzemandako bularreko minbizi kasuak*[e.] Osakidetzan atzemandako bularreko minbiziak.

 

kasu 2* e. esaterako, adibidez, hala nola, kasurako.

 

kasu isolatu* e. kasu bakan. Kasu isolatu batzuk izan dira*[e.] Kasu bakan batzuk izan dira.

 

Katalina Foixkoa, -a (Katalina Foixekoa*).

 

Katalina Medici (Catalina Medicis*).

 

katedra. Pilotaz mintzatuz, 'zaleak' erabiltzen da. Galarretako katedrak partida orekatua espero zuen*[e.] Galarretako zaleek partida orekatua espero zuten.

 

katedradun (katedratiko*).

 

Katedrala, -a. San Mames futbol zelaia. Neurrian erabiltzekoa.

 

katedratiko* e. katedradun.

 

katu persiar, katu siames.

 

katu-oin. Eskalatzeko oinetakoa.

 

kaudillo (caudillo*).

 

kaukasoar (kaukasiar*).

 

kautelazko (kautelako*). Zuzenbidean, badaezpada egiten dena. Askotan, aski da 'kautela'. Sanchez, Cuixart eta Trapero aske, kautela neurririk gabe.

 

kaxoi 1. Perkusio instrumentua.

 

kaxoi*, kajoi 2* e. tiradera. Irudizko zentzuan, hobe 'ahaztu', 'baztertu', 'geldiarazi'... «Euskadiren onerako, proiektua kaxoi batean sartzeko» eskatu zion Zapaterok Ibarretxeri*[e.] «Euskadiren onerako, proiektua ahazteko» eskatu zion Zapaterok Ibarretxeri. // Egitasmo hori kaxoian sartzea nahi dugu*[e.] Egitasmo hori geldiarazi nahi dugu.

 

kaxuela* e. kazola.

 

kayak. Ontzi mota, oso arina, luzea eta estua.

 

kazerolada* e. lapiko jotze.

 

kazetal* e. kazetari(-), kazetaritza(-). Kazetal elkartea*[e.] Kazetari elkartea.

 

kazetarien jardunbidea. Ikus 'Deontologia' atala.

 

kazike. Latinoamerikako jauntxoa. Irudizko zentzuan, nagusikeria adierazten du, emakume nahiz gizon izan.

 

kazikismo.

 

ke errezel*, ke gortina* e. ke laino.

 

kebab (kebap*). Janari mota; janari hori zerbitzatzen duten jatetxea.

 

keda egoera* e. etxeratze agindu.

 

Kefren (Khephren*). Antzinaroko Egiptoko erregea.

 

keinu hizkuntza (zeinu hizkuntza*).

 

kelta* e. zelta.

 

kelvin (kelvin gradu*). Kelvin eskala. // Lau kelvin gradu baino gehiago*[e.] Lau kelvin baino gehiago.

 

Keops (Kheops*). Antzinaroko Egiptoko erregea.

 

keramika*, keramikari* e. zeramika, zeramikari.

 

kereila.

 

kereilatu* e. kereila jarri.

 

kermeza (kermes*, kermesse*). Aire zabalean ospaturiko jaia.

 

ketchup.

 

ketzal (quetzal*). Guatemalako dirua.

 

khan. Garai batean, turkiarren eta mongoliarren erregea.

 

Khatami, Mohammad (Muhammad Jatami*).

 

khmer. Kanbodiako etnia nagusia.

 

Khmer Gorriak, -ak. Kanbodiako alderdi eta gerrilla komunista. Agintean egon zen 1975etik 1979ra. Taldearen izena letra larriz idazten da; kideak aipatzen direnean, letra xehez. Agintean izan ziren garaian, Khmer Gorriek genozidio izugarri bat egin zuten. Oihanera alde egin zuten khmer gorri askok.

 

Khomeini (Jomeini*).

 

Khrustxov, Nikita Sergeivitx (Kruschov*, Krushchev*, Khrutxev*).

 

kibbutz (kibutz*). Israelgo nekazaritza etxalde kolektiboa.

 

kilim. Turkian-eta eginiko tapiz mota.

 

Kilometroak, -ak. Gipuzkoako ikastolen jaia. Izen arruntak bezala deklinatzen da. Kilometroetara joatekoak gara.

 

kilt. Eskoziarren gona.

 

kimikari. Pertsona. Izena da.

 

kimiko. Kimikari dagokiona. Izenondoa da.

 

kimu (alebin*). Kiroletako kategoria. Gainerakoak ikusteko, jo 'kiroletako kategoriak' sarrerara.

 

kiristi. Kristaua.

 

kirofano* e. operazio gela, ebakuntza gela.

 

Kiroga, Xanti (Shanti Quiroga*).

 

kirol lege (kiroltasun*). Lehia gogorra izango da, baina kirol legez jokatua.

 

kirol probak. Ikus 'Onomastika' atala.

 

kirol taldeak. Ikus 'Onomastika' atala.

 

kiroldegi (polikiroldegi*).

 

kiroletako emaitzak, denborak eta markak. Ikus 'Ortotipografia' atala.

 

kiroletako kategoriak. Adinaren arabera, hauek dira kategoriak zenbait kiroletan: benjaminaurrekoak, benjaminak, kimuak, haurrak, kadeteak, gazteak, promesak, seniorrak eta beteranoak.

 

kiroltasun* e. kirol lege.

 

kirurgia (zirujia*).

 

Kiryienka, Vasil (Kirjenka*, Kirienka*).

 

kitara* e. zitara. Musika tresna.

 

kitarra* e. gitarra.

 

kitsch. Gustu txarreko elementuak erabiltzen dituen joera estetikoa; hedaduraz, gustu txarra edo zaharkitua. 'Kitsch' estiloa. Jauregi guztiz 'kitsch'-a.

 

kitxua (quechua*). Andeetako herri amerindiarra; haren hizkuntza.

 

Kiva. Eskola jazarpenaren kontrako programa.

 

kixotear (kixotesko*).

 

klake. Dantza mota.

 

klandestino. Gogoan izan hauek ere: 'isilpeko', 'ezkutuko', 'legez kanpoko', 'sasiko'...

 

klase 1. Politikan eta ekonomian. Gizarteko klaseak. Behe klasea, erdiko klasea, goi klasea.

 

klase 2. h. eskola. Klaseak ematen ditu unibertsitatean*[e.] Eskolak ematen ditu unibertsitatean.

 

klasika* e. klasiko.

 

klasiko. 'Klasiko' deitzen zaie txirrindularitza proba batzuei, ez 'klasika'*. Donostiako Klasikoa.

 

klaxon. Klaxona joka ari da.

 

Kleopatra (Cleopatra*, Cleopatre*). Antzinaroko Egiptoko erregina.

 

klientelismo. Politikan, mesedeak trukatzeko sistema.

 

klik egin 1. Irentsi.

 

klik egin 2. Informatikan, klikatu, botoia sakatu.

 

klikatu 1. Irentsi.

 

klikatu 2. Informatikan, klik egin, botoia sakatu.

 

klima aldaketa (aldaketa klimatiko*).

 

klimatologia. Klima aztertzen duen zientzia. Ez nahastu eguraldiarekin eta klimarekin. Klimatologiaren eraginez, fruituak gehiago heldu dira*[e.] Eguraldiaren eraginez, fruituak gehiago heldu dira. // Oso klimatologia leuna dugu Euskal Herrian*[e.] Oso klima leuna dugu Euskal Herrian.

 

klinex (kleenex*).

 

klixe (klitxe*).

 

klixeak. Ikus 'Idazkuntza' atala.

 

klon, kloniko, klonatu.

 

Klub Nautikoa, -a (Nautico*). Donostiako eraikina. Laburturik, 'Nautikoa'.

 

kluster (cluster*).

 

Knesset. Israelgo Parlamentua. Erabiltzekotan, azaldu.

 

KO. 'Knock-out'. Boxeoan, borroka bukatzeko modua.

 

ko-jabe* e. jabekide.

 

koadro 1. Margolana.

 

koadro 2. Karratua. Hamar kilometro koadro.

 

koakzionatu* e. behartu, beldurtu, bortxatu.

 

koalitatibo*, koantitatibo* e. kualitatibo, kuantitatibo.

 

koartel* e. kuartel.

 

Kobeaga, Borja (Cobeaga*). Gipuzkoar zinemagilea.

 

kobertura* e. (telefono / telebista...) seinale. Herrian ez dute koberturarik*[e.] Herrian ez dute (telefono) seinalerik.

 

kodetu (kodifikatu*).

 

kodifikatu* e. kodetu.

 

koerlazio* e. korrelazio.

 

kohete 1* e. suziri, etxafuego, txapligu.

 

kohete 2* e. suziri. Astronautikan, ontzi mota.

 

kohete 3* e. suziri. Armagintzan, jaurtigai mota.

 

kohetxo* e. eroskeria. Eroskeriagatik eta iruzurragatik auzipetu dute Kim Un-Yong, NOBeko presidenteorde ohia.

 

koilara (goilare*).

 

koiuntura, koiuntural.

 

kojin* e. kuxin.

 

kokainazale.

 

kokalero. Boliviako nekazari indigenen mugimendua; mugimenduko kidea.

 

kokatu. Gehiegi erabiltzen da. Lehen dokumentalean, Indiako Bombay hirira joko dute. Bollywood zinema industria kokatzen da han *[e.] Lehen dokumentalean, Indiako Bombay hirira joko dute. Bollywood zinema industria dago han. // Aldi hartan, Mendiluzeren buruan kokatu zen txapela*[e.] Aldi hartan, Mendiluzek irabazi zuen txapela.

 

kokildu* e. kikildu.

 

koko jantzi. Mozorroa, mozorrotu. Koko jantzian zebilen. Koko jantzita joango gara.

 

kokots. Aho azpikoa.

 

kokotxak. Jatekoak.

 

koktel, koktelontzi (cocktail*, coctel*).

 

kolaboratu 1. Politikan, kolaborazionismoan aritzea.

 

kolaboratu 2* e. laguntza eman, lagundu, parte hartu... Hainbat aldizkaritan kolaboratu zuen*[e.] Hainbat aldizkaritan parte hartu zuen. // Cass McCombs musikari estatubatuarrarekin kolaboratu zuen kantu horretan*[e.] Cass McCombs musikari estatubatuarrari lagundu zion kantu horretan.

 

kolaboratzaile 1. Politikan, kolaborazionismoan aritzen dena.

 

kolaboratzaile 2. Komunikabide batean aritzen dena, bertako langilea izan gabe.

 

kolaboratzaile 3* e. laguntzaile.

 

kolaborazionismo, kolaborazionista. Etsaiari laguntzea, batez ere kanpoko indarrek herrialde bat hartua dutenean; etsaiari laguntzen diona edo horren apologia egiten duena.

 

kolateral* e. zehar(-), albo(-). Askotan 'zehar kalte' edo 'albo ondorio' eufemismoa da, eta gehienetan 'biktima zibil' ordezkatzen du. Inoren esanetan bakarrik erabiltzen dira 'zehar kalte' eta 'albo ondorio'.

 

kolegio 1. Zenbait erakunde katolikoren izena. Angelo Sodano Vatikanoko Estatu idazkaria izango da aurrerantzean kardinalen kolegioko dekanoa. Apezpikuen kolegioa bihar bilduko da.

 

kolegio 2. h. ikastetxe.

 

kolegio 3* e. elkargo. Arkitektoen Kolegioa*[e.] Arkitektoen Elkargoa.

 

kolegio elektoral*, hauteskunde kolegio* e. bozkaleku.

 

kolektibitate 1. Taldea, gizartea, elkartea. Kolektibitatea aintzat hartu ezean, ezin aurrera egin.

 

kolektibitate 2. Frantziako administrazioko barrutia.

 

kolektibo. Gogoan izan 'talde' hitza ere. Etorkin kolektiboek sailburuarekin bildu nahi dute*[e.] Etorkin taldeek sailburuarekin bildu nahi dute. // Helburu kolektiboak taldearen estatutuetan ageri dira*[e.] Taldearen helburuak estatutuetan ageri dira.

 

Koliseoa, -a (Coliseo*, Colisee*, Coliseum*). Miarritzeko Koliseo gelan. Erromako Koliseoa. Eibarko Koliseoa.

 

koljos* e. kolkhoz.

 

kolkhoz (koljos*). Sobietar Batasunean, nekazarien kooperatiba.

 

Kolon, Kristobal (Cristobal Colon*).

 

kolore. Koloretako argazkiak bildu ditu azken erakusketara.

 

kolpatu. Zauritu. Ez erabili 'jo' adierazteko. Hondamendi horretan ere anitz hil dira eta kolpatu. // Bere indar guztiarekin kolpatu zuen atea*[e.] Bere indar guztiarekin jo zuen atea.

 

kolpismo, kolpista.

 

koltan (coltan*). Kolunbitaz eta tantalitaz osaturiko mineral antzekoa, sakelako telefonoak eta ordenagailuetako txipak egiteko erabiltzen dena.

 

koltxoi. h. lastaira.

 

kolunpio* e. zabu.

 

koma (kakotx*). Ikus 'Idazkuntza' atala.

 

komantxe (comanche*).

 

komenentzia (komenientzia*). Komenentziako ezkontza.

 

komentarista. Iritzi emailea.

 

komentatu 1. h. esan. Zerbait komentatu zion horri buruz*[e.] Zerbait esan zion horri buruz.

 

komentatu 2* e. iruzkina egin. Liburua komentatzeko*[e.] Liburuari iruzkina egiteko.

 

kometak. Hona hemen kometa batzuk: Halley kometa, Encke kometa, Hale-Bopp kometa, Shoemaker Levy 9 kometa.

 

komiki, komikilari, komiki zinta (komiki tira*).

 

komisaldegi* e. polizia etxe, komisaria.

 

komisari* e. komisario.

 

komisaria (komisaldegi*). Polizia etxea.

 

komisario (komisari*). Erakusketako komisarioa.

 

komun. Amankomuna. Esaldian josteko orduan, ez erabili 'komunean dute' eta gisakorik. Komunean dute literaturazaletasuna*[e.] Biak dira literaturazaleak. // Guztiok batzen gaituen komuneko arazo bat dugu*[e.] Guztiok batzen gaituen arazo komun bat dugu. Hilobi komun ugari arakatu ditu 2000. urtetik gaur arte.

 

Komunen Ganbera. Erresuma Batuko behe ganbera.

 

koñak (cognac*). Edari alkoholduna.

 

konbenientzia* e. egokitasun, komenigarritasun. Batzuetan, hobe da perifrasira jotzea. Erabakien komenigarritasunaren gainean eztabaidatuko dugu*[e.] Erabaki horiek hartzea komeni den eztabaidatuko dugu.

 

konbenientziako ezkontza*, komenentziazko ezkontza* e. komenentziako ezkontza.

 

konbenio* e. itun, hitzarmen. Lan ituna. Lankidetza hitzarmena.

 

konbinatu nordiko. Neguko kirola, eski jauziak eta iraupen eskia batzen dituena.

 

konbinazio (konbinaketa*).

 

konbo (combo*). Musikan, talde mota.

 

konboi (convoy*). Bi konboi militar.

 

kondatu* e. kontatu.

 

konde, kondesa, konderri (konte*, kontesa*, konterri*).

 

Kondestablearen jauregia, -a. Iruñeko jauregia.

 

kondoi. Lagunartekoa da. Erregistro neutroan, hobe 'preserbatibo'.

 

Kondor Legioa, -a (Condor Legioa*).

 

Kondor operazioa, -a (Condor operazioa*). Hego Amerikako erregimen diktatorial batzuek estatu terrorismorako 1970 eta 1980ko hamarraldietan landutako operazio plana.

 

konferentzia 1. Biltzarra.

 

konferentzia 2* e. hitzaldi, mintzaldi.

 

Konferentzia Episkopala* e. Apezpikuen Batzarra, -a.

 

konfiantza (konfidantza*).

 

konfidantza* e. konfiantza.

 

konfinamendu, konfinatu. Meusen konfinatua egoteko agindua eman zioten kartzela atarian.

 

konfit (confit*).

 

konformagaitz (ezkonformista*). Artista gazte konformagaitzak.

 

konfrontazio. Liskarra.

 

konfuzianismo, konfuzianista.

 

Konfuzio (Confucio*, Confucius*).

 

kongresu. h. biltzar. Baina Espainiako ganbera legegilea Kongresua da.

 

kongresukide (kongresista*).

 

konkretu 1* e. zehatz. Azterketa zehatza eta ongi arrazoitua.

 

konkretu 2* e. jakin. Helburu jakin bat izan behar dugu lanean hasi baino lehenago.

 

konkurrentzia libre. Ekonomian, lehia librea.

 

konkurtso administrazio, konkurtsoko administratzaile.

 

Konkurtso Legea, -a (Lehiaketa Legea*).

 

konpartitu. h. partekatu, erdibanatu... Subiranotasun partekatua.

 

konpartsakide (konpartsero*).

 

konpetentzia 1. Gaitasuna.

 

konpetentzia 2. h. konkurrentzia, lehia. Oihalgintzan konpetentzia bidegabea egitea leporatu diote Txinari*[e.] Oihalgintzan konkurrentzia bidegabea egitea leporatu diote Txinari.

 

konpetentzia 3* e. eskumen, eskuduntza.

 

konpleto* e. oso, bete. Atleta osoa. Artista bete-betea.

 

konplitu (kunplitu*).

 

konplot. Konplot egin.

 

konponduezin. Ezin konpondu den eztabaida. Izena da. Abertzaleen arteko konponduezinak.

 

konponezin. Ezin konponduzkoa. Adjektiboa da. Arazo konponezinik ez dago.

 

konposagile*, konposatzaile* e. musikagile, konpositore.

 

konposite (composite*).

 

konpositore (konposagile*, konposatzaile*). Musikagilea.

 

konpost, konpostatu, konpostagailu (konpostaje*).

 

konprometitu. Engaiatu.

 

konpromezu* e. konpromiso, engaiamendu.

 

konpromiso (konpromezu*).

 

konpromiso(z)ko akordio* e. hautsi-mautsi. Iraken inbasioaren aldekoek eta aurkakoek konpromisoko akordio bat hitzartu beharko dute*[e.] Iraken inbasioaren aldekoek eta aurkakoek hautsi-mautsi bat hitzartu beharko dute.

 

Konptoen Ganbera* e. Kontu Ganbera.

 

Konstantinopla (Constantinopla*, Constantinople*). Istanbulen izen historikoa.

 

konstelazioak. Andromeda, Antlia / Makina pneumatikoa (-a), Apus / Paradisuko hegaztia (-a), Aquarius / Akuarioa (-a), Aquila / Arranoa (-a), Ara / Aldarea (-a), Aries / Aharia (-a), Auriga / Gurdizaina (-a), Bootes / Itzaina (-a), Caelum / Zizela (-a), Camelopardalis / Jirafa, Cancer / Karramarroa (-a), Canes venatici / Ehiza-txakurrak (-ak), Canis Maior / Txakur Handia (-a), Canis Minor / Txakur Txikia (-a), Capricornus / Kaprikornioa (-a), Carina / Gila, Cassiopeia / Kasiopea (-a), Centaurus / Zentauroa (-a), Cepheus / Zefeo, Cetus / Balea, Chamaeleo / Kameleoia (-a), Circinus / Konpasa (-a), Columba / Usoa (-a), Coma Berenices / Berenizeren adatsa (-a), Corona Australis / Hego Koroa, Corona Borealis / Ipar Koroa, Corvus / Belea (-a), Crater / Kopa, Crux / Hego Gurutzea (-a), Cygnus / Zisnea (-a), Delphinus / Izurdea (-a), Dorado / Urrezko Arraina (-a), Draco / Herensugea (-a), Equuleus / Zaldia (-a), Eridanus / Eridano, Fornax / Labea (-a), Gemini / Bikiak (-ak), Grus / Kurriloa (-a), Hercules / Herkules, Horologium / Erlojua (-a), Hydra / Hidra, Hydrus / Itsas suge arra (-a), Indus / Indiarra (-a), Lacerta / Muskerra (-a), Leo / Lehoia (-a), Leo Minor / Lehoi Txikia (-a), Lepus / Erbia (-a), Libra / Balantza, Lupus / Otsoa (-a), Lynx Katamotza (-a), Lyra / Lira, Mensa / Mahaia (-a), Microscopium / Mikroskopioa (-a), Monoceros / Adarbakarra (-a), Musca / Eulia (-a), Norma / Erregela, Octans / Oktantea (-a), Ophiuchus / Ofiuko, Orion / Ehiztaria (-a), Pavo / Pauma, Pegasus / Pegaso, Perseus / Pertseo, Phoenix / Fenix, Pictor / Pintatzailea (-a), Piscis Austrinus / Hegoaldeko Arraina (-a), Puppis / Popa, Pyxis / Iparrorratza (-a), Reticulum / Sarea (-a), Sagitta / Gezia (-a), Sagittarius / Sagitario, Scorpius / Eskorpioia (-a), Sculptor / Eskultorea (-a), Scutumn / Ezkutua (-a), Serpens / Sugea (-a), Sextans / Sestantea (-a), Taurus / Zezena (-a), Telescopium / Teleskopioa (-a), Triangelum / Triangelua (-a), Triangelum Australe / Hegoaldeko Triangelua (-a), Tucana / Tukana (-a), Ursa Maior / Hartz Handia (-a), Ursa Minor Hartz Txikia (-a), Vela / Bela, Virgo (Birjina), Volasn / Arrain Hegalaria (-a), Vulpecula / Azeria (-a).

 

kontainer. Edukiontzi.

 

kontaktuan* e. harremanetan.

 

konte*, kontesa*, konterri* e. konde, kondesa, konderri.

 

kontentzioso-administratibo* e. administrazioarekiko auzietako (epaitegi, sala, prozedura...).

 

kontestu* e. egoera, testuinguru.

 

kontortsionismo, kontortsionista.

 

kontra 1. Kiroletan, gehiegi erabiltzen da, beste esapide batzuk baztertzeraino. Iazko txapeldunak gorriak ikusi zituen Goizuetakoaren kontra irabazteko*[e.] Iazko txapeldunak gorriak ikusi zituen Goizuetakoari irabazteko.

 

kontra 2. Istripuen kontakizunetan eta gisakoetan, gehiegi erabiltzen da. Arbolaren kontra jo du autoak*[e.] Arbola jo du autoak.

 

kontraanalisi (kontranalisi*). Aurreko analisi baten emaitza egiazkoa den argitzeko egiten den analisia.

 

kontraerreforma* e. kontrarreforma.

 

kontraesankor* e. kontraesanezkoa, kontraesanak izan... Jaurlaritzaren jarrera «kontraesankorra» dela salatu dute*[e.] Jaurlaritzaren jarrera «kontraesanezkoa» dela salatu dute. Jaurlaritzaren jarrerak «kontraesanak» dituela salatu dute.

 

kontrako norabide. h. kontrako bide, kontrako esku. Kontrako bidera sartu zen autobusa, eta ia jo zuen. Lo hartu eta kontrako eskutik sartu zen.

 

kontralto. Emakume ahotsetan apalena.

 

kontrapartida* e. ordain.

 

kontrapas. Dantza mota. Kontrapasak, mazurkak eta bestelako dantzak.

 

kontrapasa. Usoen pasa eta kontrapasa.

 

kontrarreforma (kontraerreforma*).

 

kontratu babestu (kontratu blindatu*). Etete klausularen gaineko epaiak kolokan jarri ditu kontratu babestuak.

 

kontratu blindatu* e. kontratu babestu.

 

kontrol antidopin* e. dopin analisi, dopin kontrol.

 

Kontseilu Orokor* e. Kontseilu Nagusi.

 

Kontseilua, -a. Euskararen Gizarte Erakundeen Kontseilua aipatzeko modu laburra da.

 

kontsentsu. h. adostasun.

 

kontserbadore. Politikan erabiltzen da.

 

kontserbagarri. Jakiak kontserbatzeko gaia.

 

kontserbatzaile. Artelanei bere hartan iraunarazten lan egiten duena.

 

kontserbera* e. kontserba enpresa, kontserba fabrika.

 

kontsulatu 1. Erakundea.

 

kontsulatu 2. Kontsuletxea.

 

kontsuletxe. Kontsulatuaren egoitza.

 

Kontsulta Legea, -a (Kontsulten Legea*).

 

kontu auzitegiak. Nafarroakoa Kontu Ganbera da. Euskal Autonomia Erkidegoko Kontu Auzitegia, Akitaniako Kontu Auzitegia, Frantziako Kontu Auzitegia.

 

Kontu Ganbera (Konptoen Ganbera*).

 

kontuan hartu, kontuan izan (kontutan hartu*, kontutan izan*).

 

Kontxa. Donostiako hondartza.

 

Kontxako Bandera (Kontxako Ikurrina*).

 

Kontzebituaren Bizia eta Emakume Haurdunaren Eskubideak Babesteko Lege Organikoa, -a. Espainian PPk 2013an abortuari buruz prestaturiko legea.

 

kontzeju. Herribatzarra.

 

kontzentratu 1. Zerbaitetan arreta jarri. Antzerkira itzuli nintzenean, oso gogorra egiten zitzaidan ordubete lanean kontzentratua egotea.

 

kontzentratu 2* e. elkarretaratu. Milaka lagun kontzentratu ziren kontsuletxearen aurrean*[e.] Milaka lagun elkarretaratu ziren kontsuletxearen aurrean.

 

kontzentratu 3* e. bildu. Asegarceko pilotariak Deban kontzentratuko dira hiru egunez, txapelketa prestatzeko*[e.] Asegarceko pilotariak Deban bilduko dira hiru egunez, txapelketa prestatzeko.

 

kontzentrazio 1. h. elkarretaratze. Jende asko bildu da kontzentrazioan*[e.] Jende asko bildu da elkarretaratzean.

 

kontzentrazio 2* e. egonaldi. Kiroletan. Hiru eguneko egonaldia egingo dute Asergarceko jokalariek Deban, txapelketa prestatzeko.

 

kontzentrazio esparru. Naziek hainbat senitarteko hil zizkieten kontzentrazio esparruetan.

 

kontzertu ekonomiko.

 

kontzesionario. Auto kontzesionario bat zabalduko dute laster.

 

kontziente izan. Testuinguru askotan, alferrikako kalkoa da. Gogoan izan hori adierazteko modu asko dagoela euskaraz: 'jabetu', 'jakin', 'jabetuta egon', 'jakinaren gainean egon', 'jakitun egon', 'konturatu', 'ohartu'... Kontziente naiz ez zaizula askorik gustatzen*[e.] Badakit ez zaizula askorik gustatzen. Kontziente ziren arriskuan zeudela*[e.] Konturatuta zeuden arriskuan zeudela.

 

kontzienteki* e. jakinaren gainean, jakitun egonik, oharturik, ohartuki. Kontzienteki egin duzu*[e.] Jakinaren gainean egin duzu.

 

kontzientzia eragozpen, kontzientzia eragozle. Kontzientzia objekzioa; kontzientzia objektorea.

 

kontziliatu, kontziliazio 1. Lana eta bizitza pertsonala bateratu.

 

kontziliatu, kontziliazio 2* e. adiskidetu, adiskidetze.

 

kooperante. Borondatezko lankidea.

 

kooperazio. Lankidetza, batez ere helburu humanitario batekin egiten dena.

 

koordinakunde (koordinadora*).

 

kopago 1* e. berriro pagatu / ordaindu, birpagatu, berrordaindu. Araban, Bizkaian eta Gipuzkoan ez da birpagatuko medikuarengana joateagatik.

 

kopago 2* e. ordainketa partekatua. Inoren esanetan bakarrik erabiltzekoa.

 

Koperniko, Nikolas (Copernico*, Copernicus*).

 

kopeta argi (frontal*).

 

kopia denda (kopistegi*).

 

kopia pirata.

 

kopistegi* e. kopia denda.

 

kopla, koplari.

 

Koral Hesi Handia, -a (Koral Barrera Handia*).

 

Korana, -a. Musulmanen liburu santua.

 

korapilatsu (korapilotsu*).

 

kordada* e. sokaldi. Badakigu Leccokoen bidetik jo izan duten kordadek tarte honetan galdu dutela gailurrera iristeko aukera*[e.] Badakigu Leccokoen bidetik jo izan duten sokaldiek tarte honetan galdu dutela gailurrera iristeko aukera.

 

korner. Futbolean eta eskubaloian, sake mota.

 

korporazio 1. Enpresa edo elkarte mota.

 

korporazio 2* e. udalbatza.

 

korpus* e. corpus.

 

korrelazio (koerlazio*).

 

korrespontsal* e. berriemaile.

 

korrido (corrido*). Mexikoko kanta mota.

 

Korrika; Korrika Kulturala, -a. Aurten ere jendetza bilduko du Korrikak Iruñean.

 

korronte 1. Elektronikan.

 

korronte 2* e. haize-laster, itsaslaster, ur-laster.

 

korronte kontra* e. haize kontra. Irudizko zentzuan.

 

korte 1* e. epai. Aizkoran.

 

korte 2* e. (ahots) tarte. Irratian.

 

kortina* e. errezel.

 

kortxete* e. parentesi karratu. Ikus 'Idazkuntza' atala.

 

kosta ahala kosta (kosta hala kosta*, kosta ala kosta*). Kostatzen dena kostatzen dela.

 

kosta izan, kostatu. Prezioa adierazteko erabiltzen denean, singularrean egiten da komunztadura. Hamar euro kosta zaizkigu zapia*[e.] Hamar euro kosta zaigu zapia. // Asko kostatu du*[e.] Asko kostatu da. Asko kostatu zaio.

 

Kosta Legea, -a (Kostako Legea*).

 

kosta zenbait. Akitaniako kosta edo Cote d'Argent (Landak), Almeriako kosta, Costa Blanca (Alacant), Costa Brava (Girona), Costa Calida (Murtzia), Costa Daurada (Tarragona), Costa de la Luz (Huelva eta Cadiz), Costa de la Tarongina / Costa dels Tarongers (katalanez) / Costa del Azahar (gaztelaniaz) (Castello), Costa del Sol (Malaga), Cote d’Opale (Pas-de-Calais), Cote d'Amour (Loire-Atlantique), Cote de Granit Rose (frantsesez) / Aod ar Vein Ruz (bretoieraz) (Manche), Cote de Jade (frantsesez) / Aod ar Vein Jed (bretoieraz) (Loire-Atlantique), Cote de Lumiere (Vendee), Cote de Nacre (Normandia), Cote d'Emeraude (Bretainia), Cote Fleurie (Normandia), Cote Vermeille (Ekialdeko Pirinioak), Garrafeko kosta (Tarragona), Granadako kosta edo Costa Tropical (Granada), Heriotzaren Kosta edo Costa da Morte (Coruña), Kantabriako kosta (Costa cantábrica*), Kosta Urdina edo Cote d'Azur / Frantziako Riviera (Itsas Alpeak), Maresmeko kosta, Valentziako kosta.

 

Kosterapea, -a. Iruñeko auzoa. Kosterapeko zuhaitzak.

 

kostu prezio* e. kostaprezio.

 

kotilioi (kotiloi*, kotilloi*). Urtezahar gaueko festa berezia.

 

kotizazio gabeko pentsio (ez-kontributibo*).

 

kotizaziopeko pentsio.

 

kotizaziopeko pentsio (kontributibo*).

 

koto* e. ehiza barruti.

 

Kotxarian, Robert (Kocharyan*, Kocharian*).

 

kotxe* e. auto. Salbuespena: haur txikiak eramatekoari 'kotxe' deritzo Hegoaldean.

 

koxer (kosher*, kasher*, kascher*). Juduen tradizioaren arabera, jateko egokia den elikagaia.

 

Krabelinen Iraultza edo Apirileko Iraultza. Portugalen 1974an izaniko estatu kolpea, Salazarrek 1926an ezarririko diktadura deuseztatu zuena.

 

kredituak, amaierako kredituak. Filmetan eta telebistako saioetan, bukaeran ageri den zerrenda, partaideen berri ematen duena.

 

Kremlin (Kremlina*). Errusiako presidentearen egoitza. Artikulurik gabe deklinatzen da. Erabakiaren kontra egin du Kremlinek berak.

 

kreol. Jatorriz europarrak izanik, antzinako kolonietan jaiotakoak; haiei dagokiena.

 

kreolera. Hizkuntza.

 

krespoi* e. xingola. Xingola beltza daramate jokalariek besoan.

 

kresteria* e. gailur-lerro.

 

kriket (cricket*).

 

krima* e. krimen.

 

krimen auzitegi (asisak*, asisetako gorteak*). Frantziako justizia sisteman, krimentzat jotakoak epaitzeko auzitegiak (fr: 'cour d'assises'). Delitutzat jotakoak, berriz, auzitegi korrekzionalei dagozkie. Arau-hauste arinak polizia auzitegiek epaitzen dituzte.

 

krimen tasa (kriminalitate tasa*).

 

kriptodibisa (kriptotxanpon*). Diru birtuala. Bitcoina kriptodibisa bat da.

 

krisi humanitario* e. giza krisi. Nazio Batuen Erakundeak Kenyako krisi humanitarioaz ohartarazi du*[e.] Nazio Batuen Erakundeak Kenyako giza krisiaz ohartarazi du.

 

krisia lehertu* e. krisia piztu.

 

krispazio* e. giro garratz, giro gaiztotu.

 

krispeta (palomita*, popcorn*, pop-corn*).

 

kristal (cristal*, crystal*). Metanfetaminaren lagunarteko izena.

 

kristau-demokrazia, kristau-demokrata.

 

Kristinaenea, -a (Kristina-Enea*).

 

Kristo Erredentorea edo Kristo Corcovadokoa, -a. Rio de Janeiroko estatua.

 

kristoren (kristolako*, kriston*). Arrunkeria da. Inoren esanetan bakarrik erabiltzekoa.

 

kriterium (criterium*). Kirol proba.

 

kritika eraikitzaile. h. kritika onuragarri, onerako kritika.

 

kritika konstruktibo* e. kritika onuragarri, onerako kritika.

 

kritikari. Kritika lanak egiten dituen pertsona. Izena da.

 

kritikatu. Kontuz esaldian jostean, ez baitu onartzen '-ela' motako osagarririk. Txentxo Jimenezek gogor kritikatu du bere kontrako «kanpaina politikoa» egin dela*[e.] Txentxo Jimenezek gogor kritikatu du bere kontrako «kanpaina politikoa». // Gaztetxea bota dutela kritikatu dute*[e.] Gaztetxea bota izana kritikatu dute.

 

kritiko. Kritikari dagokiona. Izenondoa da. Pentsaera kritikoa. Edizio kritikoa.

 

kronoigoera.

 

kronologiak. Ikus 'Idazkuntza' atala eta 'Ortotipografia' atala.

 

kros, kroslari. Lasarteko Kros Lasterketa.

 

kruasan* e. croissant.

 

kruzero 1* e. itsas bidaia.

 

kruzero 2* e. transatlantiko, gurutzaontzi. Itsas bidaia luzeak egiten dituen ontzi handia.

 

kruzero 3* e. gurutzaontzi. Gerraontzi mota.

 

Ku Klux Klan. Ameriketako Estatu Batuetako talde arrazista.

 

kuaderno* e. koaderno, kaier.

 

kuadrilla (koadrila*, kuadrila*).

 

kuadro* e. koadro.

 

kualifikazio. Prestakuntza.

 

kualitatibo, kuantitatibo (koalitatibo*, koantitatibo*).

 

kuantifikatu* e. neurtu, zenbatu.

 

kuartel (koartel*).

 

Kubango (Cubango*). Angolako ibaia.

 

kubata. Lehen, ronez eginiko edaria; gaur egun, hori ez ezik, freskagarriak eta likoreak nahasiz prestaturiko edari alkoholduna.

 

Kubo aretoa, -a. Kutxak Donostian duen aretoa. Kutxaren Kubo aretoan izango da kontzertua.

 

kubritu* e. -en berri eman. Kazetaritzan. Irakeko gerra kubritu duten kazetariak*[e.] Irakeko gerraren berri eman duten kazetariak.

 

kufija (kufiyya*, kufiya*). Arabiarren zapi tradizionala.

 

Kuiper gerrikoa, -a (Kuiperren gerrikoa*).

 

kukitxa (kukicha*). Te mota.

 

kulebroi* e. folletoi, telesail amaiezin.

 

kulot 1. Kuleroa.

 

kulot 2. Txirrindulariek-eta erabiltzen dituzten praka motzak.

 

kultu. Gurtza. Ez erabili 'ikasia' edo 'jasoa' adierazteko. Oso pertsona kultua da*[e.] Oso pertsona ikasia da. // Estilo kultuan idatzia*[e.] Estilo jasoan idatzia.

 

kultuko. Kultuko filma zen.

 

kultura. Hitz elkartuetan, '-a' gal dezake. Kultur etxea.

 

kulturarteko. Kulturen harremanei dagokiena.

 

kulturgune (kultur gune*). Baina Donostiako Koldo Mitxelena kulturunea da.

 

kung-fu (kung fu*).

 

kunplitu* e. konplitu.

 

kuorum* e. quorum.

 

kupel. h. upel.

 

kupo. Kupoa kalkulatzeko irizpideetan ados jarri nahi dute Eusko Jaurlaritzak eta Espainiako Gobernuak.

 

kupula 1. Ganga mota.

 

kupula 2* e. goi kargudunak.

 

kuria. Eliza katolikoak Erroman duen hierarkia.

 

kurrikulum* e. curriculum.

 

Kursaala, -a. Kursaalean bi areto daude: Kursaaleko auditoriuma (kubo handia) eta Kursaaleko ganbera aretoa (kubo txikia). Kursaalean egingo dute aurten ere Bertso Eguna.

 

kurtsiba* e. letra etzan.

 

kurtso politiko* e. urte politiko.

 

kuskus (couscous*). Jaki mota.

 

kutizia* e. gutizia.

 

kutsagarri. Kutsatzen duena. Oso industria kutsagarriak jarri dituzte herrian. Hondakinak «osasunerako kaltegarriak eta kutsagarriak» dira.

 

kutsakor. Erraz kutsatzen dena. Oso kutsakorra da tifusa.

 

kutun. Alaba kutun izendatu dute.

 

Kutxabank.

 

kutxazain automatiko* e. kutxa automatiko.

 

kuxin (kojin*).

 

kuzina* e. sukaldaritza.

 

Kyotoko Protokoloa, -a. Klima aldaketari buruzko hitzarmena, NBEk bultzatua, besteak beste gas kutsagarrien isuria gutxitzeko.

© Berria.eus - Euskal Editorea SM    •   Martin Ugalde kultur parkea, Andoain 20140
Telefonoa: 943-30 40 30  •   Faxa: 943-59 01 72  •  Posta elektronikoa: estiloliburua@berria.eus
webgunearen mapa