Ekainaren 1a egun historikoa izango da euskal pilotarentzat. Egun horretan ariko da lehen aldiz euskal selekzioa Nazioarteko Euskal Pilota Federazioak antolatutako txapelketa batean: zesta-puntako Nazioen Ligaren lehen ekitaldian. Abenduaren 28an Nazioarteko Federazioak eskubide osoko kide gisa onartu izanaren emaitza da. Eta nekez izan zezakeen estreinaldi hoberik euskal selekzioak, etxean jokatuko baitu aurreneko txapelketa, Gernika-Lumoko Jai Alai frontoian (Bizkaia).
Sei selekzio lehiatuko dira sei egunez, ekainaren 6ra bitarte: AEBak, Espainia, Frantzia, Filipinak, Mexiko eta euskal selekzioa. Guztiak saiatuko dira sailkatzen datorren urtean San Luisen (Argentina) jokatuko den Munduko Txapelketarako.
Nazioarteko Federazioak gaur jakinarazi du zer puntista ariko diren Nazioen Ligan. Euskal herritarrak dira gehienak: 38tik 22; hau da, %58. Euskal selekzioarekin, Espainiakoarekin eta Frantziakoarekin arituko dira gehienak, hiru selekzio horietan Euskal Herrikoak baitira ia pilotari guztiak: 24tik hogei.
Zortzi pilotari hauek lehiatuko dira euskal selekzioarekin: Aritz Erkiaga, Imanol Lopez, Eñaut Urreisti, Unai Lekerika, Elaia Gojenola, Helena Barrenetxea, Maia Goikoetxea eta Maialen Aldazabal. Espainiarekin, berriz, Euskal Herriko zazpi puntista hauek arituko dira: Gorka Mugartegi, Ruben Bailo, Erik Mendizabal, Cosme Agirre, Erika Mugartegi, Arai Lejardi, eta Lur Lejardi. Gisela Ucles kataluniarrak ere Espainiarekin jokatuko du. Azkenik, Frantziarekin bost euskal puntista hauek jokatuko dute: Ludovic Ladutxek, Jon Tanburindegik, Thibault Basquek, Oihana Sorozabalek eta Xana Gonzalezek. Johan eta Gorka Sorozabal AEBetako selekzioarekin arituko dira.
Gizonezkoetan, Espainia, Mexiko eta AEBak A multzoan ariko dira, eta, Frantzia, euskal selekzioa eta Filipinak, B multzoan. Emakumezkoetan, berriz, multzo berean lehiatuko dira euskal selekzioa, Frantzia, Mexiko eta Espainia. Ekainaren 1etik 4ra ligaxka jokatuko dute; ekainaren 5ean, finalerdiak, eta, ekainaren 6an, finalak.
