Itsas Salbamendu Humanitarioa gobernuz kanpoko erakundearen Aita Mari ontziak astelehenean erreskatatu zituen Mediterraneoan noraezean zeuden 43 pertsona. Maltara joatea zen eskifaiaren asmoa, baina salatu zuten herrialde horrek ez ziela porturatzeko baimenik ematen.
Ontzian zihoazen hiru lagun, familia berekoak, Lampedusan porturatzea ahalbidetu dute Italiako agintariek, GKEak berak jakinarazi duenez. Sare sozialetan zabaldutako mezu batean, eskerrak eman dizkiete Italiako osasun zerbitzuei, ematen ari zaizkien laguntzagatik. Beste 40 migratzailek jarraitzen dute ontzian, herrialderen batek kai segururen batera joateko baimena eman arte.
Daniel Rivas GKEaren kideak azaldu du errefuxiatuak ondo daudela. Maltak porturatzea ukatu eta gero jo zuten Lampedusarantz, baina ez soilik horregatik; Alarm Phone migratzaileentzako laguntza zerbitzuaren arabera, 55 errefuxiatu daramatzan ontzi batek lauzpabost egun daramatza noraezean, eta Lampedusa inguruan dago. Rivasen esanetan, uhartetik 33 bat itsas miliara dago. «Saiatu gara topatzen, baina ez dugu lortu». Aita Mari-k 140 bat lagunentzako tokia du.
