Estimazioetatik harago, kasuz kasu egiaztatzen ari da tortura Euskal Memoria fundazioa. Azken urteetako ikerketa horren emaitza jakinarazi dute orain: denera, 5.022 kasu egiaztatu dituzte. Lehendik jarria zuten zerrenda fundazioaren webgunean, eta 1.007 lekukotasun berri gehitu dituzte orain.
Kasu kopuruaz gain, beste hainbat emaitza ere nabarmendu dituzte. Atxilotu bai, baina torturarik salatu ez duten 776 pertsonaren testigantza bildu dute, esaterako. Tortura salatutakoetatik, %15 inguru dira emakumezkoak: 798 kasu. Espainiako Polizia (%46) eta Guardia Zibila (%42) daude kasu gehienen atzean, eta Ertzaintza dago ondoren, 350 salaketarekin (%7).
"Lekukotasun berriak jaso ahala zerrendak berritzen joatea da Fundazioaren helburua", azaldu dute Euskal Memoriatik: "Edonola ere, gaiaren konplexutasuna kontuan izanda, nekez eman ahal izango da behin betikotzat".
