Otsailaren 19tik 22ra bitartean Nafarroako Auzitegian egindako epaiketaren ondoren, epaileak hamasei urteko kartzela zigorra ezarri dio Tafallako 46 urteko gizon bati. Zigortuak hamalau labankadaz hil zuen anaia 2022ko ekainaren 21ean. Sententziaren arabera, «bat-batean eta ustekabean, erreakzionatzeko eta defendatzeko aukerarik gabe» hil zuen gizonak anaia. Epaileak azaldu duenez, bi anaiak etxe berean bizi ziren, eta etengabekoak ziren bien arteko borrokak.
Zinpeko epaimahai batek epaitu zuen akusatua. Hilketa delitu baten erruduna zela erabaki zuen, baina bi aringarrirekin: alde batetik, aitortza, anaia hil eta segituan gizona Poliziarengana joan baitzen hilketa aitortzera; bestetik, ahaidetasuna, hiltzailea eta hildakoa anaiak baitziren.
Epaileak, ordea, sententzian dio ezin duela ahaidetasunarena aringarri gisa hartu —normalean larrigarritzat hartzen da—, eta aitortzarena aintzat hartu du hilketagatik ezarri beharreko zigorra ezartzeko. Fiskalak hogei urteko zigorra eskatu zuen; defentsak, berriz, hamar urtekoa.
Epaian, zaintzapeko askatasuna ere ezarri diote akusatuari: kartzelatik ateratakoan, zaintzapean egon beharko du gehienez sei urtean. 66.350 euroko kalte ordaina ordaindu beharko dio amari.