29 urteko mendizale bat hilda topatu zuten herenegun, Orhi mendiaren eta Larraineren (Zuberoa) artean; atzo eman zuten jendarmeek ezbeharraren berri. Igandean atera zen mendirantz, Larrainetik, eta haren familiak gauean salatu zuen desagerpena.
Berehala ekin zieten erreskate lanei, helikopteroz. Biharamunean, jendarmeak eta guardia zibilak Orhira joan ziren, eta elur azpian topatu zuten hilotza. Heriotzaren zergatia argitzeko ikerketa abiatu dute. Lehen hipotesien arabera, mendizaleak irrist egin zuen elurretan, eta berrehun metrotik erori zen.
