Granadan giza eskubideen alorrean lan egiten duen elkarte bat harremanetan jarri da Delgadorekin eta Mujikarekin, bertatik bertara ezagutzeko Alboroteko emakumezko presoen egoera, emakumeen moduluko garbitasuna eta, zehazki, bi euskal presoen egoera. Izan ere, maiatzean eraman zituzten bakartze modulura. Elkarteak hilabeteak diraramatza interesa azaltzen gaiaren inguruan, eta interes hori zabaltzen ari dela azaldu dute, Andaluziako Arartekoa ere harremanetan jarri baita bi presoekin.
Ermukoa (Bizkaia) eta Donostiakoa dira bi presoak. Bizkaiko herritik, Gipuzkoako hiriburutik eta Alboroten dauden gizonezko euskal presoen sorterrietatik martxa bat egingo dute martxoaren 3an, Mujikari eta Delgadori elkartasuna adierazteko. Kartzela berean dauden euskal presoek Mujikaren eta Delgadoren egoera salatu izan dute hilabeteotan.
Emakumezkoen bederatzigarren moduluko kide dira Mujika eta Delgado. Uko egin zioten ez zegozkien lan behartuak egiteari, eta horregatik bakartu zituzten: komunak ez garbitzeagatik, zehazki. Salatu dutenez, espetxeko zuzendaritzak neurriak gogortu dizkie gizonezko euskal presoei ere, eta horiek bikoteka sakabanatu dituzte kartzelako 11 moduluetan zehar.
