Kupoaren murrizketaren bidez ordainduko dizkio Rajoyren gobernuak Eusko Jaurlaritzari bere gain hartuko dituen lanak, Iñigo de la Serna Espainiako Sustapen ministroak azaldu duenez. Hala, 2006an bi gobernuek sinatu zuten hitzarmena moldatzea adostu dute. Hasierako hitzarmenean aurreikusten zen 1.642 milioi euroko ordainketa 2.343 milioira aldatuko da.
De la Sernak adierazi duenez, Arabari, Bizkaiari eta Gipuzkoari "egonkortasun handia" emango dio akordioak, eta "bultzada erabakigarria" izango da AHTaren proiektuarentzat.
Hitzarmen berriarekin, Jaurlaritzak AHTaren ibilbideko hainbat lan hartuko ditu bere gain Gipuzkoan.
