Oihan Arnanz eta Iñaki Abad Altsasuko auziko presoek joan den ostiralean jakinarazi zieten beren senideei hasia zutela Euskal Herrirako bidea. Astebetean non zeuden jakin gabe egon ostean, Altsasuko Gurasoek gaur jakin dute Zaballan dela aurrena eta Iruñean bigarrena. Beraien deien zain daude orain, nola dauden jakiteko.
Bestetik, beste preso batek esanda, gaur jakin dute Jokin Unamuno ere eraman zutela Estremerako (Madril) espetxetik. Ordu batzuk geroako jakinarazi dute hura ere Zaballan dagoela. Nolanahi ere, Altsasuko Gurasoek salatu dute azken horrek Iruñeko espetxera eramatea eskatu zuela, eta ez Zaballakora. "Akats administratiboa" gertatu dela esan diote, eta gertatutakoa "surrealista" dela salatu dute gurasoek.
Espainiako Espetxe Zuzendaritzak gaur hamabost jakinarazi zuen Altsasuko auziko presoak Euskal Herriko espetxeetara ekarriko zituztela. Jon Ander Cob, Julen Goikoetxea, Aratz Urrizola, Oihan Arnanz eta Jokin Unamuno Zaballako kartzelan daude; Adur Ramirez de Alda eta Iñaki Abad, Iruñekoan.
