Giza eskubideen aldeko militantea

Jean Abeberri Koko (Miarritze, Lapurdi, 1932-2016) hil zen atzo, bihotzekoak jota. Osagarri arazoak zituen azkenaldian. Jakes Abeberriren anaia gazteena zen. Ezagun egin zen Euskal Herriko Giza Eskubideen Babeserako Batzordearen sortzaileetako bat izateagatik. 2014. urtean, elkartearen 30. urteurrenean, oraindik bertan militatzen segitzen zuen; arazoa ez deno konpondua ezin zela bertan behera utzi argudiatuz. Jakilea aldizkariaren eramaile ere bazen, iturri ofizialek ematen ez zuten informazioa emateko asmoz.

Bizia eman zuen militatzen Abeberrik. Hastapenetan, sindikatuetan, gero, Enbata-n: «Giza eskubideen aldeko borroka desberdinak eraman nituen. Abokatua nintzen ere, eta inguruan urraketa anitz ikusten nituen. Horrek bultzatu ninduen giza eskubideen alde lan egitera», gogoratu zuen 2014an BERRIAri eman elkarrizketan. Batzordea sortu aitzin, LDH Giza Eskubideen Aldeko Ligan militatzen zuen, baina, Ligak Ipar Euskal Herrian gertatzen zenaren inguruan borrokatzeko asmorik ez zuela jabeturik, 30 lagun bildu ziren: «Estradizioen kontra lan eginen zuen beste batzorde berri bat sortzearen deliberoa hartu genuen».