Eusko Jauraritzaren Proiektu Estrategikoen eta Industria Administrazioaren zuzendaritzak iragarri du beste parke eoliko bat eraikitzeko proiektu eskaera bat egin duela enpresa batek. Gehienez hogei megawatt-eko potentzia izango duen parke bat egiteko proiektua du Plauri Energy enpresak Otxandion, Ubiden eta Legution, Kastillo izenekoa. Enpresak proiektua eta ingurumen inpaktuaren txostena aurkeztu ditu, eta Proiektu Estrategikoen eta Industria Administrazioaren Zuzendaritzak baimen eskaera aztertu aurretik, alegazioak aurkezteko hilabeteko epea irekiko dute bihar.
Lau haize errotako parkea da Plauri enpresak egin nahi duen hori. Bakoitzak bost megawatt-eko potentzia unitarioa izango du; hala, parkeak guztira gehienez ere hogei megawatt-eko potentzia izango du. Errota bakoitza 121 metro garai izango da, eta aerosorgailuen arteko interkonexio azpiegitura Legution egongo da. Errotez gain, altuera bereko meteorologia dorre bat eraikiko dute Ubideko lurretan.
Horrez gain, Legutioko lurretan energia sekzionatzeko zentro bat eraikiko dute, eta, ondoren, ekoitzitako argindarra SET Villarreal T1 azpiestaziora garraiatuko dute.
20,5 milioi euroko kostua aurreikusi dute azpiegitura guztiak eraikitzeko. 18,7 milioi euro haize errotak eta bestelakoak eraikitzeko izango dira, ia 500.000 euro sekzionatze zentroa egiteko, eta gainontzeko 1,3 milioi euroak ebakuazio linea egiteko izango dira.
