Milaka pertsona bildu dira gaur Barakaldoko BECen EH BIlduk antolatutako ekitaldira. Bertan Arnaldo Otegi ezker abertzaleko buruzagiaren hitzak entzun ahal izan dira, Logroñoko (Espainia) espetxetik bidalitako mezuan: "Urratsak eman, urratsak batu, urratsak partekatu... Euskal Herria askatu!". Haren mezua amaitzearekin batera presoak etxeratzearen aldeko oihuak entzun dira BECen.
Nafarrek beren erabakiak hartzeko ordua dela nabarmendu du, bere aldetik, Adolfo Araizek, Bilduren Nafarroarako Legebiltzarrerako zerrendaburuak: "Nahikoa da Madrilek, Genovak, Ferrazek, Moncloak edo beste edozeinek nafarren izenean erabakiak hartzeaz. Gure borondatea da Nafarroak beste euskal lurraldeekin batera elkarlanean jardun dezala".
EH Bilduko parlamentari Hasier Arraizek hartu du ondoren hitza, eta gogorarazi, Amerikan ez ezik, aldaketa haizeak dabiltzala Europan ere: "Gero eta gehiago gara Europa zaharrean mundu berri bat eraiki nahi dugunak". Haren esanetan, Espainiak eskaintza bakarra egiten du "errepresioa eta inposaketarena" eta horren aurrean "erantzuna ere bakarra da: independentzia".
Oharra ere luzatu dio euskal gizarteari Arraizek: "Inork ez digu askatasuna oparituko, borrokatu egin behar da. Dena erabaki nahi dugu, guztia aldatzeko". Euskal ezkertiar independentisten fronte zabala osatzeko deia amaitu du agerraldia EH Bilduko parlamentariak. "Edo pentsatzen dugun moduan bizitzen hasten gara, ala bizi garen moduan pentsatzen hasiko gara".
Lehen urratsa
Arraizek aste honetan iragarri moduan "independentzia lortzeko eman beharreko hogei pausoetatik lehena" izango da gaurkoa. "10.000 peoi beltzek urrats bat aurrera egingo dute larunbat honetan euskal estatuaren eraikuntzan, estatu espainiarrari xake mate egiteko helburuarekin".
Izan ere, Arraizek argi utzi nahi izan du Euskal Bidea ez dela alderdi politikoei zuznedutako proiektua, euskal gizarteari bideratutakoa baizik, eta horretarako oinarrizkoa dela haren parte hartzea.
Hizlarien artean izan dira, besteak beste, Joxe Mari Karrere ipuin kontalaria, Jule Goikoetxea politologoa eta Arritxu Iribar kazetaria. Euskal Herritik ez ezik nazioartetik ere babesa jaso du EH Bilduren ekimenak, tartean, Greziatik eta Kurdistandik.
