Arrazakeria eta xenofobia borrokatzeko neurriak eskatu dituzte Iruñean

Arrazakeriaren eta xenofobiaren kontra egiteko neurriak eskatu dituzte dozenaka manifestarik, Iruñean. Nafarroako Immigranteen Koordinakundeak, Paperak Denontzat taldeak, SOS Arrazakeriak eta Amnesty Internationalek antolatu zuten manifestaldia, atzo eguerdian, Arrazakeriaren Kontrako Nazioarteko Egunaren harira. Eskubide guztiak denontzat leloarekin egin zuten protesta, eta Atzerritarren Espainiako Legea bertan behera uztea galdegin zuten, besteak beste. Nafarroako Gobernuari eskatu diote oinarrizko errenta jasotzeko baldintzak «lehengoan» uzteko. Eta salatu dute immigrante askorentzat errenta hori «bizirik irauteko» beharrezkoa dela baina azken erreformekin ezin eskuratuzkoa bihurtu dela.