Arriagako 'haserretuen' kanpalekuan zeudenak handik bota ditu udalak

Goizean goiz, 06:30ean, iratzarri eta kanporatu zituen atzo Poliziak Bilboko Arriaga plazan lotan zeuden 70 haserretu inguru.

Bizkaiko M-15 mugimenduak jakinarazi duenez, plazan geratzen zirenak «pertsona baztertuak dira». Prentsa ohar baten bidez argitu dutenez, «Arriagako esparrua orain dela asko gainditu, eta Auzo eta Herri Batzordea herri eta auzoetan lanean hasi zen». Izan ere, M-15 mugimenduak gaur egun antolatzen dituen ekintzak «gehienbat» Arriaga plazatik kanpo egiten dira. Horretaz gain, azpimarratu nahi izan dute kanpalekua altxatzeko konpromisoa egon bazegoela, Aste Nagusian lekua utzi behar baitzietenBilboko Konpartsei. Konpartsek eta M-15 mugimenduak «gizartealdarrikapen askotan» bat egiten dute eta, alde horretatik, mugimenduko kideek elkartea «errespetatzen» dutela jakinarazi dute.

Gizarte baztertzea salatzen

Bizkaiko M-15 mugimendukoek «finantza erakundeen mende dagoen klase politikoaren inguruan» ezinegona dagoela salatu dute, eta agertu dute sistemak pertsonen gizarte bazterketa eragiten duela, «finantza interesen» zerbitzura dagoen «merkantziatzat» erabiltzen baititu gizakiak. Bestalde, salatu dute udal politikak, baliabideak murrizten dituen aldetik, «baztertzea sustatzen» duela.