Nafarroako Foruzaingoak karguekin libre utzi ditu Gorka Ovejero Ganboa, Ibon Garcia Garrido eta Julio Villanueva, Yolanda Barcina Nafarroako Gobernuko presidenteari tarta bana botatzeagatik atxilotutako Mugitu! taldeko hiru ekintzaileak.
Foruzaingoak autoritatearen aurkako erasoa egotzi die hirurei. Espainiako Auzitegi Nazionalean deklaratu beharko dute, epaitegi hori arduratzen baita agintarien aurkako erasoen auziez. Mugitu! mugimenduak salatu du aske geratzeko hiru kideak DNA probak egitera behartu dituztela foruzainek. Ovejero, Garcia eta Villanueva ostiralean atxilotu zituzten, Iruñean, bezperan Okzitaniako Tolosan Barcinari tarta bana jaurtitzea leporatuta. Mugitu! taldeak bere gain hartu du iragan osteguneko ekintza, eta AHTaren egitasmoaren aurkako protesta zela adierazi du. Talde horrek deituta, elkarretaratzea egin zuten atzo iluntzean, Iruñean. Horrez gain, Mugitu! taldeak Euskal Herriko hainbat lekutan milaka eranskailu jarri ditu, AHTaren «triskantza» gaitzesteko.
Aske utzi dituzte Barcinari tartak botatzeagatik atxikitako hiru pertsonak
Iruzkinak
Ez dago iruzkinik
Ordenatu
