Ertzaintzak 20 urteko gazte bat atxilotu zuen Leioan (Bizkaia), asteartean, joan den uztailaren 25ean Zornotzako (Bizkaia) parke batean gazte bat jipoitzea leporatuta. Gaur igaro da epailearen aurretik Durangoko epaitegian, eta Eusko Jaurlaritzaren Segurtasun Sailak berri agentziei jakinarazi dienez, epaileak aske utzi du. Dagoeneko hamasei pertsona atxilotu dituzte jipoi horren harira. Atxilotuetatik zortzi adingabeak dira. Ikerketa zabalik dago oraindik.
Jipoia jaso zuen 23 urteko gaztea ZIU zainketa intentsiboen unitatean dago oraindik ere, oso larri, garunaren bi aldeak baitauzka oso kaltetuta erasoaren ondorioz.
