Europa Press berri agentziak zabaldu duenez, Guardia Zibilak Iker Rodrigo Basterretxea Sortuko kidea atxilotu du gaur goizean Bilbon. Xabier Lopez Peña euskal presoa zenaren gorpua ostiralean Euskal Herriratu zuten, eta harrera egin zioten Sondikako aireportuan aurrena eta Galdakaon ondoren. Omenaldiak Rodrigok antolatu dituelakoan, "terrorismoa goratzea" leporatu diote. Goizeko bederatziak inguruan hartu dute atxilo.
Sortuko Bizkaiko Herrialde Kontseiluko koordinatzaile ordea da Rodrigo. Omenaldi hartan 200 pertsona inguruk hartu zuten parte, eta han izan ziren, besteak beste, LABeko idazkari nagusi Ainhoa Etxaide eta Tasio Erkizia ezker abertzaleko kidea. Aurresku bat dantzatu zioten zerraldoari, eta Eusko gudariak kantatu zioten.
Frantziako Fleury-Merogis espetxetik martxoaren 11n ustekabean Parisko ospitale batera eraman, eta ia hiru aste geroago zendu zen Lopez Peña.
