Uxue Barkos Nafarroako presidenteak eta Javier Esparza UPNko buruak eztabaida sutsua izan dute gaur, Nafarroako Parlamentuaren osoko bilkuran, ETAren biktimak direla eta.
Esparzak biktimen duintasuna iraintzea leporatu dio Barkosi. Gobernuak EH Bildurekin legealdirako ituna egin izana salatu du; haren esanetan, koalizioak ETA justifikatzen duelako. "EH Bilduk ETA justifikatzen jarraitzen du, ez du barkamenik eskatu, ez du lagundu nahi argitu gabe dauden hilketak argitzen", adierazi du.
Horrez gain, ETAko kideak omentzea egotzi dio Barkosi, indarkeria polizialaren biktimen omenezko ekitaldietan parte hartzeagatik.
Barkosek ez ditu Esparzaren argudioak onartu. Biktimen duintasunarekiko irainik handiena Esparzaren "gezurrak" direla erantzun du.
Presidenteak ziurtatu du berak gidatzen duen gobernuak ETAren biktimen aldeko hainbat neurri abiarazi dituela, eta neurri horiek ontzat eman dituela AVT Terrorismoaren Biktimen Elkarteak. Gobernuaren politikak memoria eta biktimen egia, justizia eta ordainerako eskubidea ditu helburu, Barkosen esanetan. Ildo horretan, "terrorismoaren biktimen arretarako programa" eta jardunaldiak antolatu dituztela nabarmendu du. Barkosek Esparzari erantzun dio UPNk ez duela halako neurririk hartu 20 urtetan. UPNri biktima batzuk "bazterrean utzi" izana aurpegiratu dio.
Barkosek gaineratu du Nafarroako Gobernua laguntzen ari zaiela estatuaren partetik dagokien ordain ekonomikoa jaso ez duten biktimei, "UPNk ez baitzien lagundu".
AVT elkarteak joan den astelehenean jardunaldiak antolatu zituen, lehenengoz, Nafarroako Goberuaren laguntzarekin, eta UPNk uko egin zion joateari. Barkosek Esparzari ohartarazi dio jarrera horrekin bere burua bazterrean uzten ari dela UPN.
"Inoiz ez diot ETAren biktimei entzuteari utzi, eta inoiz ez naiz erdibidean egon biktimen eta borreroen artean", adierazi du Barkosek.
