Barrios eta Beaumont presoen lagun eta senide batzuek istripua izan dute

Txetxu Barrios Atarrabiako presoaren lagun batek eta Iñaki Beaumont Iruñeko presoaren osabak auto istripua izan zuten atzo,Granadako Albolote espetxean bisita egin eta etxera abiatu zirenean. Espetxetik gertu, bidegurutze batean, eguraldiaren eraginez, autoaren kontrola galdu, buelta bat eman, eta olibondo bat jo zuten.Ez ziren zauritu, baina autoak kalte handiak izan zituen. Kilometro asko egin zituzten Naia Lacroix presoaren Senpereko lagunek ere. Herrira mugimenduak deituta, 50 bat lagun Gradignango espetxera joan ziren. Beste euskal preso batzuk ere badaude han, baina Lacroix bakartuta dago. Paul Asensio presoa, berriz, Zaballako espetxera eraman dute, alaba jaio berria ezagutzera.