ETB2n atzo gauean egin zuten Euskadi Pregunta saioaren bigarren atala. Hainbat herritarrek aurreko astean Laura Mintegiri galdetu ostean, atzo Antonio Basagoiti PPko lehendakaritzarako hautagaiaren txanda iritsi zen. Askotarikoak izan ziren galderak, baina batek sortu zuen, batik bat, harridura gehien.
Mikel Ortiz de Etxebarria irakasle bilbotarrak horrela galdetu zion: "Euskal herritarren gehiengo handi batek Espainiatik independente izatea erabakiko balu, Espainiako Konstituzioaren 8. artikulua ezarri eta tankeak aberriaren batasuna berreskuratzera bidaltzearen alde egongo al zinake?".
Basagoitik garbi erantzun zuen esanez gehiengoa izanda ere ez lukeela onartuko: "Ni legedia betearaztearen aldekoa naiz, Konstituzioa gustatu edo ez". Ondoren gehiengo batek ere ezin duela legediaren aurka egin gaineratu zuen, eta demokrazia zer den legeak ezartzen duela. "Gehiengoek irizpide eta planteamentu demokratikoen barruan egon behar dute".
Hori esan aurretik, ordea, sarean harridura handia sortu zuen esaldia bota zuen Basagoitik, erantzunaren hasieran: "Nik hemen ikusi ditudan tanke, bonba, pistola eta lehergai bakarrak ez ziren armadarenak, ETArenak baizik, kalean, Basurtun, Ondarroan, Donostian, Gasteizen".
