Beñat Espil euskaltzale zuberotarra zendu zen atzo. Mauleko eta Zuberoako Gaü Eskolaren sortzaileetarikoa zen Espil, eta horren eramaileetarikoa urte luzeetan. Zuberoako ikastolen borrokan ere parte hartu zuen.
Iparretarrak taldeko militantea izan zen, eta luzaz Ekaitza aldizkari politikoan artikulu idazten aritu zen. 2021ean zendu zen Allande Sokarrosen adiskidea ere bazen; funtsean, haren errautsen hedatzeko egunean Espilek berak idatzia zuen oroitzeko testua irakurri zuen.
Artikulu franko idazten segitu zuen Ekaitza bukatuta ere, zenbait aldizkaritan. Anitzetan, frantsesez.
Ikerzaleak elkartearekin, bestalde, Lehenago, Xiberoa = Autrefois, la Soule liburua idatzi eta plazaratu zuen 2003an.
Zuberera ikasteko
Gaü Eskolako ikasleek zuberera ikasteko metodoak landu zituen. 2016an, Mauleko Gaü Eskolako ikasleek etxean euskara ikasteko material pedagogikoa Internetez eskuratzeko plantan eman zuten sistema aurkezterakoan, hala zioen Espilek Mediabask kazetan euskararen erabilpenari buruz: «Usteen kontra, Zuberoa nagusiki frantses hiztuna da, eta euskaraz aritzeko guneak eskas ditu. Maskaradaz eta pastoralez aparte, arras leku guti dute euskaldun berriek zuberera erabiltzeko eremu publikoan. Zoritxarrez, euskaraz aritzea oraino ekintza militantea da. Bitxi bada bitxi, Gaü Eskola euskaraz aritzea tabu ez den leku bakarrenetarik bat da».