Ia hilabete joan da egun bakarrean Hego Euskal Herrian zenbatutako kutsatu kopurua azkenekoz mila kasuren langatik behitikoa izan zenetik. Transmisioari buruzko aldagai guztiek bistan utzi dutenez, birusa hanpatua da ordutik. Oldarraldia uztailaren laugarren astean izan zen nabarmenen, eguneko kasuak 2.000 baino gehiago izan baitziren. Geroztik, kopuruak ez dira hain puztuak, baina, edonola ere, kutsatuei buruzko datuak aski beltzak dira oraindik. Osakidetzak eta Osasunbideak beste 1.118 kasu detektatu zituzten atzo Hegoaldean, 9.894 diagnostiko proba eginda. Hau da, testen %11,3k eman dute positibo ostiralean.
Lurraldez lurralde, Nafarroako Gobernuak eta Eusko Jaurlaritzak emandako datuen arabera, Bizkaian 520 positibo atzeman dira; Gipuzkoan, 247; Nafarroan, 239, eta Araban, berriz, 93.
Ospitaleei so, Hegoaldeko osasun sistemek argitaratutako informazioari erreparatuta, atzo beste 60 lagun erietxeratu zituzten COVID-19aren sintomak larriagoturik. Nafarroako Gobernuak zehaztapena egin du herrialde horretan ospitaleratutakoei buruz: 11 izan zira guztira, eta horietako bi ZIUetan sartu dituzte zuzenean. Horiek aintzat haturik, Hegoaldeko ZIU zainketa intentsiboetako unitateetan guztira 85 lagun daude gaitzarekin ospitaleratuta, larri.
