Osakidetzak eta Osasunbideak 13.619 test egin zituzten atzo COVID-19a atzemateko, eta 1.168 kasu positibo detektatu zituzten guztira. Hala, egun bakarrean Hegoaldean zenbatutako kutsatu kopurua hirugarren egunez jarraian da mila kasuren langatik goitikoa. Gainera, positiboen ehunekoak gora egin du berriz ere: %8,5 da, atzo egindako diagnostiko probak oinarri.
Herrialdez herrialde, Gipuzkoan atzeman da kasu gehien ostegunean: 431 izan dira. Hain zuzen, Osakidetzak hirugarren egunez detektatu ditu 400 kasu baino gehiago lurralde horretan. Joera antzekoa hartu du Bizkaiak ere: 425 positibo izan dira han. Halaber, Nafarroan 190 kutsatu zenbatu dituzte, eta Araban, berriz, 117.
Gipuzkoako datuak, gero eta ilunago
Osasun sistema egunetik egunera zenbatzen ari diren kutsatuez gainera, kezkagarria da Hegoaldeko lau lurraldeetako intzidentzia tasek hartutako joera. Dena dela, guztien artetik, birusa bereziki Gipuzkoa ari da zigortzen azkenaldian; hala erakusten dute datuek. Zehazki, azken hamalau egunetan 100.000 biztanleko 701 laguni atzeman diete COVID-19a Gipuzkoan. Tasa aski apalagoa da beste herrialdeetan, baina larri dira, halere: Bizkaian 455 da tasa; Araban, 440; eta Nafarroan, berriz, 385.
