Osakidetzan 2016-2017an egindako LEP lan eskaintza publikoaren iruzurraren auzia ikertzen duen epaileak beste bederatzi lagun inputatu ditu; beraz, dagoeneko hogei pertsona daude inputatuta. Jon Darpon Eusko Jaurlaritzako Osasun sailburu ohia eta Maria Jesus Mujika Osakidetzako zuzendari nagusi ohia «asmo bidegabeetarako elkartzearen» delituagatik auzipetzeko eskatu zuen LAB sindikatuak, irailaren 1ean. Hala ere, epaileak atzera bota du ideia hori, eta ez ditu Darpon eta Mujika inputatuko.
Auzipetuak izan diren bederatzi akusatuak ESK sindikatuak proposatutakoak dira. Gasteizko 2. Instrukzio Epaitegiko epaileak 2022ko urtarrilera arte luzatuko du ikerketa, eta ESK sindikatuak esan du onuragarria dela: «Sakonki behatuko dugu dena; epaileak ez zituen onartu eskaera batzuk, eta horren aurrean errekurtsoa aurkeztu daiteke».
«Asmo bidegabeetarako elkartzearen» delituaz gain, LABek Darpon eta Mujika auzipetzeko sekretuak ezagutarazteagatik, kontratazioan iruzur egiteagatik, prebarikazioa egiteagatik eta delituak ikertzeari uko egiteagatik. Epaileak ezezkoa eman du; beraz, LABek adierazi du «nahitaezkoak ziren ateak» itxi dituela, eta errekurtsoa jarriko du: «Filtrazioen gaia soilik sekretuen errebelazio delitura lotzea akatsa da, ondorio larriak izan ditzakeena».
2018ko ekainean hasi zen auzia, eta Arazoan Mujikak dimisioa aurkeztu zuen. 2019ko otsailean jarri zuen fiskaltzak Osakidetzaren aurkako salaketa, eta Jon Darpon Osasun sailburuak dimisioa eman zuen martxoan. Maiatzean Mujika lekuko bezala deklaratzera deitu zuten.
