79 urteko bi mendizale sokorritu dituzte suhiltzaileek arratsalde honetan Sarako Ibanteli mendian (Lapurdi). Arratsaldeko laurak inguru atera da Dragon 64 Segurtasun Zibileko helikopteroa bi mendizaleen bila.
Mendizaleek eurek kontatu dutenez, nekea sentitu dute ibiltzen ari zirela, eta sorospen zerbitzuak abisatu dituzte. Helikopteroz hartu dituzte, eta Lizarrietako lepora eraman dituzte. Onik atera dira sorospen operaziotik, zauririk gabe.
Atzo, berriz, parapentelari bat erreskatatu zuten Anboto mendian, Atxondoko San Juan auzoan (Bizkaia). Hanka batean zauria zuen. Ertzaintza eta suhiltzaileak bertaratu ziren zauritua zegoen lekura, eta Iurretara (Bizkaia) eraman zuten lehenik, eta ospitalera gero.