Errepideen finantzaketaren harira izan dute berriro ere liskarra Gipuzkoako Diputazioak eta EAJk. Markel Olanok gutun bat erakutsi du gaur hedabideen aurrera aterata —presaz deitu dute prentsaurrekora—. Larraitz Ugarte BIde Azpiegituretarako diputatu eta Bidegiko presidentearen eskutitza da, eta, horretan, adierazten da Olanoren agintaldiko faktura batzuk falta direla Bidegiren egoitzan. Horiek non ote dauden argitzeko eskatzen zaio eskutitzean EAJko kideari, eta gogorarazten zaio elkartearen egoitzatik paper horiek ateratzea legearen aurkakoa dela. Olanok salatu du "erantzukizuna" berari egotzi nahi izan diola Ugartek, eta nabarmendu du "beti" egon direla fakturak enpresaren egoitzan.
Ohar baten bidez erantzun du diputazioak. Jakitera eman du Olanori gutuna bidali eta hurrengo egunean "kaxa batean" azaldu zirela fakturak. "Faktura horiekin gertatutakoa ikusia, Aldundiak argi du Bidegiko lehendakariak arduraz, egoki eta legeak dioenaren arabera jokatu zuela. Faktura batzuk ez aurkitzea larria da, eta egoera horren aurrean behar bezala erantzun zuen".
EAJk Martin Garitano ahaldun nagusiaren agerraldia eskatuko du Batzar Nagusietan. Joseba Egibar GBBko presidenteak salatu du "iraganeko jokamoldearekin" jarraitzen duela ezker abertzaleak. "Amorrua eta gorrotoa ditu EAJrekiko".
