Lehenik Burlata, eta orain Lizarra. 2017ko abuztuaren 4an, Lizarrako festen hasieran udaletxean ikurrina jarri zen. Nafarroako Parlamentuak 2003ko Ikurren Legea indargabetu ondotik, ikurrina jartzeko arazo legalak ustez amaitutzat zeuden, baina Iruñeko epaitegi batek esan du legea kentzearekin ez dela aski.
Epaiaren arabera, Ikurren Legea kentzeak "ez du arautzen eta babesten ez beste autonomia erkidego baten bandera ez zehazki ikurrina jartzea". Epaileak dioenez, legea indargabetzen zuen erabakiak beste foru lege bati egiten zion aipamen, baina hori oraindik "onartu gabe" dago.
Epailearen arabera, legea indargabetze hutsarekin elkarbizitzaren eta tolerantziaren aldeko politikak bilatzen direla esatea ez da aski. "Nafarroako Parlamentuak beste foru lege bat onartzen ez duen bitartean, ez dago 1981eko legean araututa ez dauden beste ikurrak erakusterik. Lege horrek behartzen du administrazioko eraikin guztietan bandera espainiarrak, erkidegokoa eta udalekoa jartzera".
