Hizkuntza eskubideei buruz Eusko Jaurlaritzak duen zerbitzuak, Elebidek, inoiz baino intzidentzia gehiago jaso zituen iaz: 789 denera —2014an, adibidez, 412 izan ziren, ordura arteko kopururik handiena—.
Osakidetza dago igoera horren oinarrian, eta, batez ere, osasun zerbitzua euskaraz eskatzeko asmoz Gipuzkoako herri batzuetan egindako kanpaina. Kexuak eta eskariak bideratzen aritu ziren joan den urtean herri batzuetan; kanpaina horren harira, 142 kexu eta 262 eskaera jaso ditu Elebidek. Hala ere, Osakidetzari buruzko kexuak ez dira soilik kanpaina haren ondorio izan. “Egia da egunez egun jasotako kexa kopurua ere nabarmen igo dela”, dio Elebideren iazko memoriak. Eguneroko kexei dagokienez, batetik langileek jarritakoak daude —batez ere jakinarazpenak gaztelaniaz bidali dizkietelako—, eta bestetik, herritarrenak, mediku euskaldunak ordezkatzeko erdaldun elebakarrak bidali dizkietelako.
Administrazioaren kontrakoak dira salaketa gehienak, batez ere idatzizko harremanekin lotutakoak. Eremu pribatuari dagozkion kexuak, berriz, gero eta gutxiago dira. Konparaziorako: arlo publikoaren aurka 420 kexu jarri zituzten, eta arlo pribatuaren aurka, 50.
Hizkuntza eskubideak oro har bermatzeko zerbitzua da Elebide, ez euskaldunenak bakarrik. Datuak zinez argiak dira, ordea: 470 kexu horietatik, bakarra dagokie gaztelania hiztunei.
