Bilboko Sare Feministak hirian izan diren azken sexu erasoak salatzeko ekintza egin du gaur goizean. Bilboko Udaletxeko zubia moztu dute, 09:00 inguruan. Emakume talde batek trafikoa moztu du, eta manifestariak zubira kateatu dira. Adi erasotzaile! Nonahi gaude leloa zuen pankarta zabaldu dute, eta bi emakume zubitik zintzilikatu dira. Ordu eta erdiz izan dute zubia moztuta.
Bilboko neska gazteen sareak Udaletxeko zubia moztu du azken asteetako erasoak eta Txurdinagako bortxaketa salatzeko! Eta nola ez, udaletxe eta ertzaintzaren emakumeontzako "aholkuak"! #goraborrokafeminista#autodefentsa#Erasorikezerantzunikgabe@Paredeustu@ErnaiBilbopic.twitter.com/KuXPWihrE2
— iratisienra (@iratisienra) August 15, 2019
Manifestariek adierazi dutenez, azken egunetan Bilbon izan diren sexu erasoak salatzeko ekintza izan da. Bereziki, Etxeberria parkean izandako talde bortxaketa gaitzetsi dute. Halaber, "elkartasuna" adierazi diete Donostiako Aste Nagusian sexu erasoak jasan dituzten emakumeei.
Larunbatean hasiko da Aste Nagusia Bilbon, eta Bilboko Sare Feministak ohartarazi du ez duela inolako sexu erasorik onartuko.
Bestalde, manifestariek kritikatu egin dituzte Ertzaintzak emakumeen segurtasunerako zabaldu dituen argibideak. Nabarmendu dute emakumeengan jartzen dutela arreta, erasotzaileengan jarri beharrean.
Ertzaintzak protestan parte hartu duten hainbat lagun identifikatu ditu, eta "desordena publikoa" leporatu die hogei bat ekintzaileri.
