Espainiako Poliziak bost lagun atxilotu ditu Gasteizen, zenbait migratzaileren erregularizazioa errazteko ezkondu izana leporatuta. Poliziak azaldu du ustezko komenentziazko ezkontza horien xedea migratzaileen lege egoera erregularizatzea zela, eta, horregatik, immigrazio klandestinoa laguntzea, langileen eskubideen aurkako delitua, prostituzio koaktiboa eta talde kriminal bateko kide izatea egotzi diete bost atxilotuei.
Poliziak zehaztu duenez, Dominikar Errepublikako herritarrekin hitzartzen zituzten ustezko ezkontzak. Diruaren truke egiten zuten hori. Gainera, Espainiako Poliziak adierazi du biktimetako bat «prostituzioaren munduan sartzera» behartu zutela, «zorra kitatzeko».
Ikerketak zabalik jarraitzen du, eta ez dute baztertu biktima gehiago topatzerik.
