Espainiako Gorteetarako hauteskundeen boto kontaketa BERRIAren webgunean jarraitu ahal izango da igande honetan. Botoak zenbatu ahala, emaitzez gain, unean-unean eserleku banaketa nola geratuko litzatekeen ikusi ahalko da. Hego Euskal Herriko emaitzez gain, Araba, Bizkai, Gipuzkoa eta Nafarroako emaitzak lurraldeka kontsultatu ahal izango dira, baita herrietako emaitzak ere. Kontaketa hasi bitartean 2011ko emaitzak kontsultatu ahal izango dira webgune berezian. Kongresurako eta Senaturako emaitzak eskainiko ditu BERRIAk, eta udal eta foru hauteskundeetan bezala, mapa interaktibo batean bilduko ditu alderdi bakoitzak jasotako botoak.
20:00etan bozkalekuak ixten direnetik, webgunean aritzen den kazetari taldea indartuko du BERRIAk, eta hauteskunde gauaren berri xehe-xehe emango dute zuzeneko kontaketa batean. BERRIAko teknikariek garatu duten sistemari esker kontaketa horretako edukiak zuzenean partekatu ahalko dira Facebooken eta Twitterren, eta Whatsappen sakelako batetik irakurtzen arituz gero. #A20hashtag-a erabiliko du BERRIAk hauteskundeei buruzko bere edukiak partekatu eta euskarazko edukien artean biltzeko.
Goizeko zortzietan hasiko da BERRIA Espainiako Gorteetarako hauteskundeen berri ematen webgunean. Ordu horretatik aurrera irakurgai izango da igandean Rajoyren agintaldiaren inguruko erreportaje sorta. Horrez gain, hauteskunde egunaren zuzeneko kontakizuna hasiko da. Webgune berezian, kanpainan bai paperean baita webgunean argitaratutako informazio guztia irakurri ahal da: albisteak, elkarrizketak eta bestelakoak.
Egun osoan emango du BERRIAk webgunean hauteskundeen berri. Arreta berezia eskainiko dio Hego Euskal Herrian gertatzen denari, baina Katalunian eta Espainian gertatzen denari ere. Eguerdiko eta arratsaldeko parte hartze datuak jasoko ditu. Horrek guztiak isla izango du astelehenean argitaratuko den paperezko edizioaren zenbaki berezian ere. Hauteskunde eguneko irabazle eta emaitzen berri emateaz gain, edizio berezi horrek iritziak eta analisiak ere irakurgai jarriko ditu, lehen uneko irakurketa zabal bat eskaintzearren.
Astelehenean, BERRIAk Andoaingo erredakziotik telebista saio berezia eskainiko du 11:00etan emaitzak baloratu eta akordio posibleez jarduteko. Martxelo Otamendi BERRIAko zuzendariak aurkeztuko du, eta Kristina Berasain Mundua saileko kazetaria eta Joxerra Senara Politika saileko kazetaria izango ditu ondoan. BerriaTBk emaitza ikusgai jarriko ditu, beste gauza batzuen artean, eta Espainiako hauteskundeek Euskal Herriari begira zer gako utzi dituen aurreikusiko dituzte mahaiko hiru kideek. Webgunean hauteskundeen biharamunaren berri ere jasoko da.
