Atzo Manuel Valls Frantziako Barne ministroak esandakoari emandako erantzuna da Europako Batzordearena, Vallsek gogor egin baitu ijitoen kontra, beste behin: "Konponbidea, partez, kanporatzea da. Gureez oso bestelako bizimodua dute ijito errumaniarrek eta bulgariarrek".
Europako Batasunaren barruan mugitzeko askatasuna eta ezein estatukidetan bizilekua izatekoa "oinarrizko eskubideak" direla ohartarazi dio Olivier Bailly batzordeko bozeramaileak Parisi, "izan errumaniar, bulgariar, edo frantziar", nahiz eta baliabide ekonomikoak dituztela erakutsi behar duten estaturen batean bizi ahal izateko, iritsi eta hiru hilabetera.
Errumania eta Bulgaria ez dira Schengen eremuko parte, baina hori ez da eragozpen EBn libre ibiltzeko, nahiz eta kontrolak igaro behar dituzten, Erresuma Batuko herritarrei gertatzen zaien bezalaxe.
Amnesty Internationalen salaketa
Kanpalekuetatik gogoz kontra ateratzen "errekorra" du Frantziak, AI Amnesty Internationalek salatu duenez: "10.000 ijito baino gehiago" bota ditu 2013ko lehen seihilekoan. Kasu gehienetan ez dute beste toki batera joaterik izan eta ez die aurretik abixua eman.
200.000 ijito inguru bizi dira Frantzian, gehientsuenak errumaniarrak eta bulgariarrak.
