Bart gauean abiatu zen kamioia, eta Zangozatik (Nafarroa) Pasaiarako (Gipuzkoa) bidea egingo du, ondoren Japoniara itzultzeko. Judasen bentan dago orain, eta gaur gauean abiatuko da berriro, 23:00ak aldera, Zuastira (Nafarroa). Ibilbide osoa gauez egingo du, trafikoa ahalik eta gutxien oztopatzearren. Asteburuan zeharkatuko du Gipuzkoa.
Kamioi erraldoia 100 metro luze da, 6,5 metro zabal, 5,3 metro garai, eta 515 toneladako pisua du; Euskal Herriko errepideetatik inoiz ibilitako garraiobiderik handiena da. Harekin batera, Nafarroako Foruzaingoko hogei agente doaz, trafikoa kontrolatzeko.
Joan den urteko urriaren 24an heldu zen makina Pasaiara, eta Euskal Herrian zehar egin duen ibilbide honen helburua Japoniatik ekarritako haize errota baten bihotza Zangozan probatzea izan da.
