Bost minutuko isilunea egingo dute Eusko Legebiltzarrean, urtero, hildako legebiltzarkideen urteurrenaren harira. Bakoitzaren urteurrenetik gertuen egokitzen den osoko bilkura baino lehen egingo dute ekitaldia. Datorren ostiraleko bilkuran izango da lehena, Enrique Casasen eta Fernando Buesaren omenez. Casas (PSE-EE) 1984ko otsailaren 23an hil zuten Komando Autonomo Antikapitalistek, eta Buesa (PSE-EE) 2000ko otsailaren 22an ETAk.
Ekitaldiez gain, bakoitzaren omenezko plaka bana jarriko dute legebiltzarrean. Buesaren eta Gregorio Ordoñezen omenezkoak bazeuden lehendik, eta Casas eta Santi Brouardenak jarriko dituzte orain, senideen oniritzia jasota.
Brouard (HB) GALek hil zuen, 1984ko azaroaren 20an, eta Ordoñez (PP) ETAk, 1995eko urtarrilaren 23an.
Aho batez hartutako erabakia
Proposamena EAJk egin zuen, eta legebiltzarreko mahaiak onartu ondoren, bozeramaileen batzordean hartu dute aurrera jotzeko erabakia. EH Bilduko Laura Mintegik, PSE-EEko Jose Antonio Pastorrek, PPko Borja Semperrek eta UPDko Gorka Maneirok eman diote babesa.
