Udal eta foru hauteskundeetako albiste, emaitza eta xehetasun guztiak biltzeko asmoz, BERRIAk luze eta zabal emango du bozketa egunaren eta hauteskunde gauaren berri igandean. Bozkalekuak irekitzen direnetik, webgunean egunaren nondik norakoak jasoko ditu, tartean, hautagaien adierazpenak eta parte-hartze datuak. Eguneko eskaintza berezia, ordea, 20:00etan hasiko da, hauteskunde gauarekin batera.
Kanpainan webgune berezian 2011ko emaitzekin egin duen moduan, BERRIAk boto zenbaketa hastearekin batera ikusgai jarriko ditu aurtengo emaitzak ikusteko grafiko bereziak. Nafarroako Parlamentuko, Araba, Bizkai eta Gipuzkoako Batzar Nagusietako eta Hego Euskal Herriko herri guztietako emaitzak izango dira ikusgai, eta zenbaketa zuzenean on-line jarratu ahal izango da udal hauteskundeen kasuan eta Nafarroako Parlamenturako bozen kasuan.
Horrekin batera, Gaindegiarekin egindako emaitzen mapa interaktiboa ere ikusi ahal izango da, herri bakoitzean nork irabazi duen eta alderdi bakoitzak non irabazi duen ikusteko, modu azkar eta argian. Mapan lehentasuna izango dute udal hauteskundeek. Zenbaketaren erdian eguneraketa bat izango d, eta beste bat, zenbaketa amaituta. BERRIAren udal eta foru hauteskundeetako webgune berezian mapa hori bera 2011ko emaitzekin ikusteko aukera dago.
#M24 web berezian 2011ko emaitzekin egin bezala http://t.co/ZVpQPCnloO igande gauean aurtengo emaitzen mapa BERRIAn pic.twitter.com/fSm2wBquA8
— Berria.eus (@berria) May 22, 2015Beste grafiko batean arreta berezia eskainiko zaie Nafarroako Parlamenturako hauteskundeei, alderdi bakoitzak eskuratzen duen eserleku kopuruari erreparatuz. Hori aintzat hartuta, izan ahal diren koalizioak aurreratuko ditu BERRIAk webgunean. Igandean arreta berezia jarriko zaie Nafarroako foru hauteskundeei. Lau lurraldeek, ordea, atal berezi bat izango dute, foru hauteskundeetako emaitzekin, hiriburuetako emaitzekin eta herri nagusietako irabazleeak jasoz. Albiste horietan, gainera, kanpainan landutako edukiak gehituko dira, eskura izateko, esate baterako, bideoak, infogramak eta elkarrizketak.
Zuzeneko kontakizuna, 'Kaieran'
Sare sozialetan, aurreko hauteskunde batzuetan bezala, bere presentzia indartuko du BERRIAk, #M24, #M24Nafarroa, #M24Araba, #M24Bizkaia eta #M24Gipuzkoa eta bateko eta besteko informazioa bideratuko du Twitterren, sare sozial horrek aldi berean ematen dituen aukerak baliatuz. Hala ere, hauteskunde gaueko zuzeneko kontakizuna ere egingo du BERRIAk, kanpainan erabili duen Kaiera-ren bitartez. Zuzeneko kontakizunaren bitartez azken ordukoak bermatuko ditu BERRIAk webgunean; sakelako telefonoetan erraz irakurri ahal izango da, gainera.
22:00etan, gainera, Hamaika telebistaren zuzeneko saioa ikusi ahal izango da webgunean. Jose Felix Azurmendi, Karmelo Landa, Iñaki Zarraoa eta Pello Urzelai BERRIAko Politika saileko arduradun ohia izango dituzte gonbidatu Bilboko platoan, eta telefonoz Martxelo Otamendi BERRIAko zuzendaria, Iñaki Soto Gara-koa eta Bingen Zupiria Deia-koa ariko dira. Ordu eta erdiko saioa izango da.
Astelehenean, papereko egunkaria
Aurreko beste hauteskunde batzuetan egin duen bezala, BERRIAk astelehenean egunkaria argitaratzea erabaki du, eta igandeko emaitzekin iritsiko da ezohiko zenbaki berezia harpidedunen etxeetara eta kioskoetara. Hego Euskal Herriko hiri eta herri guztietako emaitzak emateaz gain, foru hauteskundeetako gakoak emango dira papereko egunkarian, eta astelehenetik aurrera horrek ekar dezakeen ikuspegia ere bai. Horiez gain, kronikak, balorazioak eta analisiak ere izango dira.
Informazio horrek guztiak jarraipena izango du hurrengo egunetan, bai webgunean baita egunkarian ere.
